लईराईचा जत्रोत्सव सुरू

शिरगाव येथील जत्रोत्सवानिमित्त श्री देवी लईराईच्या दर्शनासाठी जाणारे भक्तगण. (छाया : दुर्गादास गर्दे)

डिचोली, दि. २९ (प्रतिनिधी): गोवा, महाराष्ट्र आणि कर्नाटकातील लाखो भाविकांचे श्रद्धास्थान असलेल्या शिरगाव येथील श्री लईराई देवीचा पाच दिवसीय जत्रोत्सव मोठ्या उत्साहात व भक्तिमय वातावरणात सुरू झाला आहे. गोव्यातील तसेच शेजारच्या राज्यांमधील भक्तांचे आज सकाळपासूनच शिरगाव येथे आगमन सुरू झाले. देवीच्या दर्शनासाठी आज सकाळपासूनच मंदिरापुढे भक्तांची रांग लागली होती. येथील पवित्र तळीत स्नान उरकून व्रतस्थ धोंडांनी देवीचे दर्शन घेतले. "लईराई माता की जय' अशा घोषणा देत व्रतस्थ धोंड हातात सजवलेली वेताची काठी घेऊन येथे मांडण्यात आलेल्या होमकुंडाला मोठ्या श्रद्धेने प्रदक्षिणा घालत होते.
आज रात्री मध्यरात्रीनंतर हे व्रतस्थ घोंड अग्निदिव्यातून (होमकण) जाणार आहेत. रविवार दि. ३ मे पर्यंत भक्तांना कौल देणे सुरूच राहणार आहे.
जत्रेच्या निमित्ताने मोठी फेरी भरली असून अस्नोड्याहून शिरगावपर्यंत जाता यावे यासाठी वाहतूक, सुरक्षा आदी चोख व्यवस्था ठेवण्यात आली आहे.