शिवोली येथे सापडला अज्ञात तरुणीचा सापळा

पणजी, दि. २९ (प्रतिनिधी) : आसगाव शिवोली येथील डोंगरावर एका अद्यात तरुणीचा सापळा पोलिसांना आढळून आला असून तो वैद्यकीय चाचणीसाठी गोवा वैद्यकीय महाविद्यालय इस्पितळात पाठवून देण्यात आला आहे.
या सापळ्याची उंची १४० ते १४४ सेंमी असून त्याच्या बाजूला काही हाडे व केस तसेच काही अवयव आढळून आल्याचे पोलिसांनी म्हटले आहे. त्याचप्रमाणे महिलेचे एक सॅंडल, गुलाबी रंगाच्या चुडीदाराचा टॉप व पॅंट, विविध रंगाच्या बांगड्या, "एवा' कंपनीचे एक मनगटी घड्याळ व केसांना घालण्याचे चंदेरी रंगाचे "हेअरक्लिप' सापडल्याची माहिती हणजूण पोलिसांनी दिली आहे. सदर तरुणीचा मृत्यू एका महिन्यापूर्वी झाला असून तिचे २८ ते ३० च्या आसपास असण्याची शक्यता वैद्यकीय अहवालात व्यक्त करण्यात आली आहे.
याविषयाची अधिक तपास हणजूण पोलिस स्थानकाचे निरीक्षक रमेश गावकर करत असून कोणालाही यासंदर्भात माहिती असल्यास त्याने हणजूण पोलिसांशी संपर्क साधण्याचे आवाहन करण्यात आले आहे. माहिती देणाऱ्याचे नाव गुप्त ठेवले जाणार असल्याचे पोलिसांनी स्पष्ट केले आहे.