स्वाइन फ्लू रोखण्यास सरकारी यंत्रणा सज्ज, प्रामुख्याने विदेशी पर्यटकांवर नजर

पणजी, दि. २८ (प्रतिनिधी) : मेक्सिको,अमेरिका,न्यूझीलंड,फ्रान्स,कॅनडा आणि ब्रिटन आदी देशांत सध्या वराह ज्वराचे ("स्वाइन फ्लू') थैमान माजले असून तेथून पर्यटक मोठ्या प्रमाणावर गोव्यात येत असल्याने राज्य सरकारने या रोगाची साथ गोव्यामध्ये पसरू नये यासाठी आपली यंत्रणा पूर्ण सज्ज ठेवली आहे.
सार्स आणि बर्ड फ्लूनंतर आता 'स्वाइन फ्लू' या डुकरांपासून होणाऱ्या जीवघेण्या रोगाची साथ जगभर पसरण्याचा धोका उत्पन्न झाला आहे. जागतिक आरोग्य संघटनेनेही या साथीच्या प्रादुर्भावाबद्दल चिंता व्यक्त केली आहे. येत्या मंगळवारपर्यंत आढावा घेतल्यानंतर संबंधित देशांत "महामारी' घोषित करण्याची तयारी ठेवण्यात आल्याने या रोगाची व्याप्ती मोठी बनली आहे.
दरम्यान,गोवा हे आंतरराष्ट्रीय पर्यटनस्थळ असल्याने येथे लाखो विदेशी पर्यटक भेट देतात. परिणामी जागतिक आरोग्य संघटनेकडून गोव्याचा समावेश संभाव्य ठिकाण म्हणून करण्यात आला आहे. त्यामुळे याप्रकरणी सरकारला अत्यंत सावध राहण्याचा सल्ला संघटनेतर्फे देण्यात आला आहे. मुख्यमंत्री दिगंबर कामत यांनी आज ताबडतोब वरिष्ठ अधिकाऱ्यांची बैठक बोलावून ही साथ गोव्यात पसरू नये यासाठी प्रतिबंधात्मक उपाय योजण्याचे आदेश दिले आहेत. लोकांनी या साथीची धास्ती बाळगण्याचे कारण नाही, अशी सूचना मुख्यमंत्री कामत यांनी केली आहे.
दरम्यान,या विषयातील तज्ज्ञ डॉ.राजेंद्र तांबा यांनी दिलेल्या माहितीनुसार सर्व आरोग्य केंद्रांतील अधिकाऱ्यांना सतर्क करण्यात आले आहे. विदेशी पर्यटकांच्या घशात कापसाचा बोळा घालून त्याचे "सॅपल्स'चाचणीसाठी पाठवण्याची तयारीही करण्यात आल्याचे ते म्हणाले. तसेच केंद्रीय आरोग्य मंत्रालयाने ब्रिटन,अमेरिका,कॅनडा आणि न्यूझीलंड या देशांतील पर्यटकांची आरोग्य तपासणी विमानतळावरच करण्याची सूचना केली आहे. या आदेशानुसार दाबोळी विमानतळावर आरोग्य अधिकाऱ्यांच्या दोन तुकड्या तैनात करण्यात आल्या असून त्यांच्याकडून या पर्यटकांच्या घशाचे "सॅंपल्स'काढण्यात येत आहेत.गेल्या दहा दिवसांत ब्रिटनमधून सुमारे पाचशे पर्यटक गोव्यात दाखल झाले आहेत. या पर्यटकांचा शोध घेऊन त्यांना जवळच्या आरोग्य केंद्राद्वारे चाचणी करून घेण्याची सूचना करण्यात येईल, असेही डॉ.तांबा म्हणाले. गोव्यात फक्त ब्रिटनमधून यंदा सुमारे २०,२८३ पर्यटक आले आहेत. त्यात आता गेल्या दहा दिवसांत ५०० अतिरिक्त पर्यटकांची भर पडली आहे. पर्यटन खात्याकडून उपलब्ध माहितीनुसार गेल्या १८ एप्रिल रोजी मोनार्क चार्टर विमानातून ८० पर्यटक ब्रिटनमधून आले. नंतर १९ रोजी एकूण पाच चार्टर विमाने दाखल झाली असून त्यातून ३२७ पर्यटक गोव्यात दाखल झाले.२० एप्रिल रोजी थॉमस कूक या चार्टरमधून आणखी ५० पर्यटक आले आहेत. त्यानंतरच्या पर्यटकांची माहिती अद्याप खात्याकडे पोहचली नसल्याचे सांगण्यात आले. हे सगळे पर्यटक राज्यातील विविध किनारी भागांत पसरले असून त्यांचा शोध घेऊन त्यांची आरोग्य चाचणी करण्याचे आव्हान आरोग्य खात्यासमोर आहे.
दरम्यान,आरोग्य खात्याच्या डॉक्टरांनी दिलेल्या माहितीनुसार या साथीचा प्रादुर्भाव डुकरांच्या संपर्कात आल्यास होऊ शकतो. वराहज्वर हा श्वसन नलिकेला होणारा रोग आहे व तो प्रामुख्याने डुकरांना होतो. हा रोग माणसाच्या खोकल्यातून,शिंकण्याने,रोगाचा प्रादुर्भाव झालेल्या जागेला स्पर्श होऊन तो हात तोंडाला, नाकाला किंवा डोळ्याला लागल्याने इतरांना होऊ शकतो. या रोगाची लक्षणे ताप येणे,आळस वाटणे,भूक व लागणे,खोकला येणे,नाक वाहणे,घसा सुकणे,मळमळणे,उलटी येणे आणि जुलाब होणे आदी आहेत.
गृहमंत्री रवी नाईक व मुख्य सचिव हौजेल हौखुम यांनी आरोग्य आणि पशुचिकित्सा खात्यातील वरिष्ठ अधिकाऱ्यांबरोबर या साथीबाबत चर्चा केली. हे प्रतिबंधात्मक उपाययोजना उद्या २९ पासून राबविण्यात येणार आहेत.
विशेष पथकाची स्थापना
मुख्यमंत्री दिगंबर कामत यांनी या साथीवर प्रतिबंधात्मक उपाय योजना करण्यासाठी गोवा वैद्यकीय महाविद्यालय,आरोग्य खाते,पशुचिकित्सा व संवर्धन खाते आणि पर्यटन खाते यांच्या प्रमुखांची एक विशेष पथक स्थापन करण्याचे आदेश दिले आहेत. या पथकावर या संपूर्ण कामाची जबाबदारी असेल. घशात कापसाचा बोळा घालून त्याचे सॅंपल घेऊन ते पुणे येथे संशोधन प्रयोगशाळेत पाठवण्यात येणार आहेत. दरम्यान,चिखली येथील इस्पितळात यासाठी स्वतंत्र वॉर्डची सोय करण्यात आली असून गरज भासल्यास तेथे उपचार करण्यात येतील व चाचणीनंतर आवश्यक औषधे देण्याची तयारीही ठेवण्यात आली आहे.
विदेशात कहर
या रोगाचा सर्वांत जास्त प्रादुर्भाव मेक्सिकोमध्ये झालेला असून रविवारपर्यंत १०३ जण दगावले असून ४०० जणांना हॉस्पिटलमध्ये दाखल करावे लागले आहे. आणखी १,६०० लोकांना बाधा झाली असावी, अशी भीती मेक्सिको सरकारने व्यक्त आहे.
अमेरिका खंडातील कॅनडा आणि अमेरिकेतही स्वाइन फ्लूने प्रवेश केला असून कॅनडात सहा तर अमेरिकेत २० जणांना प्रादुर्भाव झाल्याचे त्यांच्या सरकारांनी स्पष्ट केले आहे. त्यांपैकी कॅनडातील दोघांना मेक्सिकोत गेल्यानंतर स्वाइन फ्लूची लागण झाली असून ते १६ ते १८ वर्षीय तरुण आहेत. याशिवाय न्यूझीलंड, हॉंगकॉंग, स्पेन या देशांतही स्वाइन फ्लूूची बाध झाल्याचे वृत्त आहे.
हा रोग अत्यंत घातक असल्याने जपान, चीन, रशिया, इंडोनेशिया, थायलंड तसेच संयुक्त अरब आमीराती या देशांनी स्वाइन फ्लूचा प्रादुर्भाव रोखण्यासाठी उपाययोजना केल्या आहेत. जपानने तातडीने फ्लूविरोधी लसनिमिर्ती सुरू केली असून विमानतळांवर परदेशातून येणाऱ्या लोकांच्या तपासणीसाठी डॉक्टरांचे पथक तैनात केले आहे. चीनने मेक्सिकोतून येणाऱ्या डुकरच्या मटणावर बंदी घातली आहे. मेक्सिकोतील गंभीर परिस्थिती पाहून स्वाइन फ्लू रोखण्यासाठी आरोग्यसुविधा उभारण्यासाठी जागतिक बॅंकेने तातडीने २० कोटी डॉलर्सचे कर्ज देऊ केले आहे.