'कसाबला तंदुरी, मला दुधीची भाजी'

वरुणची सरकारवर टीका
मेरठ, दि. २९ : मुंबई हल्ल्यातील आरोपी मोहम्मद अजमल आमीर कसाब याने आज चक्क अत्तर आणि टूथपेस्टची मागणी केली असतानाच भाजपचे नेते वरुण गांधी यांनी सरकारवर टीकास्त्र सोडीत, अतिरेक्याला या सरकारच्या राज्यात तंदुरी चिकन मिळतेय, पण माझ्यासारख्या कैद्याला मात्र कारागृहात दुधी भोपळ्याची भाजी दिली जाते, असे म्हटले आहे.
मेरठ येथे एका जाहीर सभेत २९ वर्षीय वरुण गांधी म्हणाले की, आपल्या देशातील विरोधाभास जगावेगळाच म्हणावा लागेल. येथे रासुकाअंतर्गत कारागृहात असणाऱ्या वरुण गांधीला दुधी भोपळ्याची भाजी दिली जाते. याउलट, मुंबईवर अतिरेकी हल्ला करून असंख्य लोकांचे जीवन उद्ध्वस्त करणाऱ्या कसाबसारख्या अतिरेक्याला तंदुरी चिकन जेवणात वाढले जाते. अर्थात, मी शाकाहारी असल्याने मला दुधी आवडते, अशी पुष्टीही त्यांनी जोडली.
मी मुस्लिमांच्या विरोधात बोललो असा आरोप ठेवून मला रासुका लावण्यात आला आणि २६ नोव्हेंबरचा भीषण हल्ला घडविणाऱ्या आरोपीवर साध्या भारतीय दंड विधानाची कलमे लावण्यात आली. यातूनच सरकारचा उद्देश स्पष्ट दिसतो. त्यांनी केवळ मला लक्ष्य बनवून ही कारवाई केली आहे. मी कॉंग्रेसविषयी थेट काहीही बोलणार नाही. कारण आता त्यांचे दिवस भरले आहेत. जे लोक मरणासन्न स्थितीत अखेरच्या घटका मोजत असतात त्यांच्याविषयी काहीही वाईट बोलू नये, असे मला माझ्या आईने सांगितले आहे. अशा कॉंग्रेसला मत देणे म्हणजे आपले मौल्यवान मत एखाद्या खड्ड्यात टाकण्यासारखे आहे, असेही वरुण गांधी म्हणाले.
मायावतींचा हत्ती
मायावती सरकारवर टीका करताना वरुणने म्हटले की, मी काल लखनौत गेलो होतो. तेथे इरिगेशन कॉलनीत कांशीराम मेमोरियल उभारले जात आहे. त्यासाठी सुमारे ३२ हजार कोटी रुपये इतका खर्च येणार असल्याचे समजते. इतकी रक्कम आज देशातील सुमारे पाच लाख युवकांना रोजगार देण्यासाठी कामी पडू शकते. सरकारी पैशाचा असा दुरुपयोग करणे मायावतींना शोभत नाही. आता त्या लोकसभेत जाऊन पंतप्रधान होण्याचे स्वप्न पाहत आहेत. पण, हत्तीसाठी लोकसभेचे दार फारच लहान आहे. तेथे तो शिरू शकणार नाही, असे म्हणत वरुण गांधी यांनी आपण हे विधान मायावती नव्हे तर बसपाचे निवडणूक चिन्ह असलेल्या हत्तीसाठी वापरल्याची स्पष्टोक्ती देऊन उपस्थितांमध्ये हास्याची कारंजी उडविली.