उत्तर गोवा उमेदवारीचे त्रांगडे आज सुटणार?

निर्मला व देशप्रभू यांच्यात चुरस

पणजी, दि. २९ (प्रतिनिधी) - कॉंग्रेसतर्फे दक्षिणेत फ्रान्सिस सार्दिन यांच्या नावाची घोषणा झाल्यानंतर आता उत्तर गोवा लोकसभा उमेदवार निश्चितीसाठी हालचाली तेज झाल्या आहेत. उत्तर गोव्याची जागा राष्ट्रवादी कॉंग्रेसला देण्याबाबत दिल्लीत शिक्कामोर्तब झाल्याचे एकीकडे सांगितले जात असले तरी मुख्यमंत्री दिगंबर कामत यांच्या आल्तिनो येथील सरकारी निवासस्थानी आज दोन्ही पक्षांच्या नेत्यांची उच्चस्तरीय बैठक झाली असता दोन्ही पक्षातील नेत्यांनी ही उमेदवारी आपल्या वाट्यालाच येईल,असा विश्वास व्यक्त केल्याने हा गुंता अजूनही सुटला नसल्याचे स्पष्ट झाले आहे. उद्या दुपारी १२ वाजता पुन्हा बैठक बोलावण्यात आली असून त्यात उमेदवारीवर शिक्कामोर्तब करण्यात येईल, अशी माहिती यावेळी देण्यात आली.
आज मुख्यमंत्री कामत यांच्या नेतृत्वाखाली उच्चस्तरीय बैठक बोलावण्यात आली. यावेळी कॉंग्रेस प्रदेशाध्यक्ष सुभाष शिरोडकर, राष्ट्रवादीचे प्रदेशाध्यक्ष डॉ.विल्फ्रेड डिसोझा, महसूलमंत्री जुझे फिलिप डिसोझा, पर्यटनमंत्री मिकी पाशेको, शिक्षणमंत्री बाबूश मोन्सेरात, कळंगुटचे आमदार आग्नेल फर्नांडिस, प्रफुल्ल हेदे व विष्णू वाघ आदी नेते हजर होते. सौ. निर्मला सावंत यांच्या उमेदवारीला कॉंग्रेसमधूनच तीव्र विरोध होत आहे. त्या पार्श्वभूमीवर आता प्रदेश कॉंग्रेसचे प्रवक्ते जितेंद्र देशप्रभू यांचे नावे पुढे आल्याची खात्रीलायक माहिती मिळाली आहे. तडजोडीचा उमेदवार म्हणून अखेर देशप्रभू यांच्या गळ्यात ही उमेदवारी पडण्याची दाट शक्यता आहे.
गोव्यातील लोकसभेच्या दोन्ही जागांसाठीची अधिसूचना जारी होऊन उमेदवारी अर्ज स्वीकारण्याची प्रक्रिया सुरू झाली आहे. तरीही कॉंग्रेस-राष्ट्रवादीत उमेदवारीवरून घोळ सुरू आहेच.
पंचायतमंत्री बाबू आजगावकर यांचे नाव पुढे करण्याचे प्रयत्न आघाडी सरकारातील काही नेत्यांनी केले होते. बाबूंनी रिंगणातून माघार घेतली आहे. डॉ. विली व सुभाष शिरोडकर यांनी उत्तर गोव्याबाबत अद्याप काहीही निर्णय झाला नसल्याचे पत्रकारांना सांगितले.आजच्या बैठकीत दोन नावांची चर्चा झाली आहे व उद्यापर्यंत एकाचे नाव जाहीर होईल,असा विश्वास जुझे डिसोझा यांनी व्यक्त केला. दरम्यान, ही जागा नक्की कोण लढवेल हे अस्पष्टच आहे. पुढील विधानसभेसाठी राष्ट्रवादी कॉंग्रेसला मांद्रे मतदारसंघ देऊन त्या बदल्यात उत्तर गोव्याची जागा कॉंग्रेसने लढवावी असाही प्रस्ताव या बैठकीत चर्चेला आल्याची माहिती मिळाली असून त्यामुळे जितेंद्र देशप्रभू यांच्या नावाची चर्चाही झाल्याचे सांगण्यात आले.