कॅसिनोंचे सील काढल्याने आयोगातर्फे गंभीर दखल

पणजी, दि. २८ (प्रतिनिधी) - मांडवी नदीतील कॅसिनोंवरील करण्यात आलेली कारवाई व त्याच दिवशी संध्याकाळी त्यांना ठोकण्यात आलेले सील काढण्यात आल्याच्या प्रकाराची सुओमोटो दखल निवडणूक आयोगाने घेतली आहे. कॅसिनोंवरील कारवाईच्या घटनाक्रमांबाबतचा अहवाल उत्तर गोवा जिल्हाधिकाऱ्यांकडून मागवण्यात आला असून सरकारची ही कृती आचारसंहितेचा भंग ठरते की काय, याची चौकशी केली जाईल,अशी माहिती मुख्य निवडणूक अधिकारी अजित श्रीवास्तव यांनी दिली.
आज येथे आयोजित केलेल्या पत्रकार परिषदेत ते बोलत होते. भाजपने विष्णू वाघ यांच्याविरोधात केलेल्या तक्रारीबाबत चौकशी सुरू असल्याचे ते म्हणाले. निवडणूक प्रचारात सरकारी अधिकाऱ्यांनी किंवा कर्मचाऱ्यांनी भाग घेता कामा नये. कोणत्याही सरकारी कर्मचाऱ्याविरोधात तशा तक्रारी आल्यास त्याची गंभीर दखल घेतली जाईल, असा इशाराही त्यांनी दिला.आतापर्यंत एकूण सहा ते सात तक्रारी मुख्य निवडणूक अधिकाऱ्यांकडे दाखल झाल्या आहेत व त्याबाबत चौकशी सुरू आहे, असेही ते म्हणाले.
गोव्यात निवडणूक काळात एकूण १२ सुरक्षा कंपनी तैनात करण्यात येणार आहेत.मद्यविक्री तथा पुरवठ्यावर कडक नजर ठेवण्यात आली आहे. प्रचारकाळातील प्रत्येक महत्त्वाच्या घटना व जाहीर सभांचे चित्रीकरण करण्यात येणार आहे तसेच उमेदवारांकडून करण्यात येणाऱ्या खर्चाचा तपशीलही मागवण्यात येणार असून आचारसंहितेची कडक अंमलबजावणी केली जाईल,असेही त्यांनी यावेळी सांगितले.
निर्भय होऊन मतदान करा
इलेक्ट्रॉनिक्स मतदान यंत्राव्दारे करण्यात येणारे मतदान हे पूर्णपणे गोपनीय असते.मतदाराने कोणाला मतदान केले याची माहिती राजकीय पक्ष किंवा अन्य कोणालाच कळत नाही. त्यामुळे कुणाच्याही दबावाला बळी न पडता मतदारांनी निर्धास्तपणे लोकशाहीचा आपला पवित्र मतदानाचा हक्क बजावावा,असे आवाहन श्रीवास्तव यांनी केले.
आज पहिल्यांदाच पत्रकारांशी त्यांनी संवाद साधला. यावेळी साहाय्यक निवडणूक अधिकारी कुलभूषण सुरजुसे हजर होते.गोव्यातील दोन्ही लोकसभा मतदारसंघांसाठी एकूण १३३८ मतदान केंद्रे असतील. यावेळी गेल्या निवडणुकीच्या तुलनेत एकूण ३३८ मतदान केंद्रे वाढवण्यात आल्याचे श्रीवास्तव म्हणाले. गोव्यात एकूण १०,१८,८८३ अधिकृत मतदार आहेत. त्यात ५,१०,९६२ पुरुष तर ५,०७,१०६ महिला मतदारांचा समावेश आहे. उत्तर गोव्यात ४,८६,६३७ तर दक्षिणेत ५,३१,४३१ मतदारांचा समावेश आहे.