प्रिया दत्तच्या विरोधात पूनम महाजन?

मुंबई, दि. २९ - दिवंगत भाजप नेते प्रमोद महाजन यांची कन्या पूनम महाजन हिला उत्तर मध्य मुंबईची उमेदवारी मिळण्याचे संकेत भारतीय जनता पार्टीने दिले असून तिने याला मंजुरी दिल्यास तिचा सामना थेट कॉंग्रेसच्या प्रिया दत्तशी होणार आहे.
याबाबत भाजपाच्या सूत्रांनी सांगितले की, पूनम महाजन गुढीपाडव्याच्या शुभेच्छा देण्यासाठी राज ठाकरे यांना भेटण्यास गेल्या होत्या. सणासुदीच्या निमित्ताने कोण कोणाला भेटतंय, हा मुद्दा पक्षासाठी फारसा महत्त्वाचा नाही. या भेटीवरून पूनम असंतुष्ट असल्याचा निष्कर्षही काढता येणार नाही. त्यांनी अखेरच्या क्षणी ईशान्य मुंबईच्या उमेदवारीची मागणी केली. त्याक्षणी सोमय्या यांना तिकीट देण्याचा निर्णय झाला होता. त्यानंतर त्यांनी दक्षिण मुंबईची तिकीट मागितली. पण, ही तिकीट जागावाटपाच्या करारात शिवसेनेच्या वाट्याला गेली. त्यामुळे तेथेही उमेदवारी मिळण्याचा प्रश्न नव्हता. आता उत्तर मध्य मुंबईतून पूनम महाजन यांना उमेदवारी दिली जाऊ शकते. त्यांना मान्य असेल तर पक्षाकडून त्यांच्यासाठी या जागेचा पर्याय खुला आहे.
पक्षाने यापूर्वी पूनम महाजन यांना कल्याण आणि पुणे या दोन जागांची उमेदवारी देऊ केली होती. पण, त्यांनी दोन्ही जागा नाकारल्या होत्या. अद्याप उत्तर मध्य मुंबईतून पक्षाने कोणाचीही उमेदवारी घोषित केलेली नाही. त्यामुळे हा पर्याय पूनमसाठी खुला आहे. पण, ही जागा फारशी सुरक्षित नसल्याचे पक्षाचे मत आहे. त्यामुळे आता पक्षाने निर्णय पूनम महाजन यांच्यावरच सोडला आहे.