महागाईविरोधात दिल्लीत आज भाजपचा मेळावा

१० लाख कार्यकर्ते अपेक्षित
नवी दिल्ली, २० : भारतीय जनता पक्षाने उद्या राजधानीत आयोजिलेल्या महागाईविरोधी मेळाव्यासाठी काही लाख लोक रात्रीपर्यंत येथे दाखल झाले आहेत.
येथील रामलीला मैदानावर आयोजिलेल्या या मेळाव्यास किमान १० लाख लोक येतील, असा दावा पक्षाकडून केला जात आहे. देशभरातून ८ हजार बसेस व राज्याराज्यातून विशेष रेल्वेगाड्यांमधून भाजप कार्यकर्ते व समर्थकांचे दिल्लीत पोहोचणे सुरू झाले आहे.
रामलीला मैदानावर सकाळी १० वा सुरू होणारा हा मेळावा दुपारी २ पर्यंत चालेल असे समजते. या मेळाव्यास पक्षनेते सर्वश्री लालकृष्ण अडवाणी, पक्षाध्यक्ष नितीन गडकरी, लोकसभेतील नेत्या श्रीमती सुषमा स्वराज, राज्यसभेतील नेते अरुण जेटली, माजी अध्यक्ष राजनाथसिंग, व्यंकय्या नायडू, डॉ. मुरलीमनोहर जोशी हे नेते संबोधित करतील.
भारतीय जनता पक्षातर्फे या मेळाव्याची व्यापक व्यवस्था केली जात असून, यासाठी पक्षाने एक नियंत्रणकक्ष स्थापन केला आहे. मेळाव्याला येणाऱ्यांसाठी पिण्याचे पाणी, वैद्यकीय सोयी याकडे विशेष लक्ष देण्यात आले आहे. पुरानी दिल्ली रेल्वेस्थानक, नवी दिल्ली रेल्वेस्थानक व निझामुद्दीन या तिन्ही प्रमुख रेल्वेस्थानकांपासून रामलीला मैदानाकडे जाण्याचा मार्ग ठरविण्यात आला आहे. मेळाव्यासाठी देशभरातून येणाऱ्या बसेस दिल्लीच्या सीमेवरच अडविल्या जातील, अशी भीती भाजपानेत्यांना वाटत आहे. त्याचप्रमाणे विशेष रेल्वे गाड्याही १२-१२ तासांच्या विलंबाने सोडण्याच्या तक्रारी आल्या असल्याचे पक्षाचे सरचिटणीस अनंतकुमार यांनी सांगितले.
भाजपच्या प्रत्येक खासदारालाही मेळाव्यासाठी येणाऱ्यांची व्यवस्था करण्याचे एक विशिष्ट लक्ष्य देण्यात आले आहे. बहुतेक खासदार आज मेळाव्याच्या तयारीत व्यस्त दिसून येत होते.
रामलीला मैदानावरून संसदेकडे कूच करण्याचा कार्यक्रम पक्षाने ठरविला आहे. मात्र, त्यापूर्वीच रामलीला मैदानावर वा संसदभवन मार्गावर पक्षाच्या नेत्यांना अडविले जाईल, असे समजते.
दिल्ली पोलिसांनीही या मेळाव्यासाठी व्यापक सुरक्षा बंदोबस्त केला आहे. वाहतूक पोलिसांनी काही भागातील वाहतूक नियंत्रित करण्याचा निर्णय घेतला आहे. या मेळाव्यामुळे उद्या राजधानीतील जनजीवन विस्कळीत होईल, असे मानले जाते.