ललित मोदींच्या पाठीशी फारूख, शिल्पा, मल्ल्या

नवी दिल्ली, दि. २० : आयपीएलचे आयुक्त ललित मोदी यांच्यावर करण्यात आलेल्या आरोपांना उत्तर देण्यासाठी त्यांना संधी देण्यात यावी, असे मत मोदी यांची पाठराखण करताना केंद्रीय मंत्री फारूख अब्दुल्ला यांनी आज व्यक्त केले. ललित मोदींची बाजू ऐकल्याशिवाय त्यांना शिक्षा करण्याचा आपल्याला हक्क नाही. त्यांच्यावर जर आरोप केले जात आहेत तर त्या आरोपांना उत्तर देण्याची संधी त्यांना निश्चित दिली जावी, असे अब्दुल्ला संसदेबाहेर पत्रकारांशी बोलताना म्हणाले. आयपीएलचे सर्वेसर्वा असलेल्या मोदींना राजस्थान रॉयलची मालक शिल्पा शेट्टी तसेच बेंगलोर रॉयल चॅलेंजर्सचे डॉ. विजय मल्ल्या यांनी यापूर्वीच पाठिंबा जाहीर केला आहे. दरम्यान, आयपीएलच्या गव्हर्निंग काऊन्सिलची बैठक २६ एप्रिल रोजी होणार असून त्यात ललित मोदी यांच्यासंदर्भात सर्वसंमतीने अंतिम निर्णय घेतला जाईल, अशी घोषणा बीसीसीआयचे माजी अध्यक्ष शरद पवार यांनी केली आहे.
ललित मोदींवर आयपीएल वादासंदर्भात जे आरोप केले जात आहेत, त्याकडे बघता मोदींनी राजीनामा द्यावा का, असे विचारले असता आयपीएलच्या गव्हर्निंग काऊन्सिलचे सदस्य असलेल्या फारूख अब्दुल्ला यांनी त्यांना एक संधी देण्यात यावी, अशी मागणी केली. आयपीएलमधील चुका लपविण्याचा बीसीसीआय प्रयत्न करीत आहे का, असे विचारता फारूख म्हणाले, कोणीही काहीही लपवीत नाही. येत्या २६ एप्रिल रोजी आयपीएलच्या गव्हर्निंग काऊन्सिलची बैठक होत असून त्यात सर्व बाबी स्पष्ट होतील. जर कुणाला जावयाचे असेल तर २६ च्या बैठकीत आम्हाला ते समजेल.
डॉ. विजय मल्ल्या यांनीही मोदी यांची बाजू घेताना त्यांनी आयपीएलमध्ये उत्कृष्ट कामगिरी केल्याचे सांगितले. जर त्यांनी आयपीएलमध्ये कोणतेच चुकीचे काम केले नाही तर त्यांनी राजीनामा देण्याचा प्रश्नच येत नसल्याचे ते म्हणाले.
आयपीएल भारतातच नव्हे तर विदेशातही यशस्वी झाले आहे. याचे श्रेय केवळ मोदी यांनाच जात असल्याचे राजस्थान रॉयल्सच्या शिल्पा शेट्टीने म्हटले आहे. आयपीएलच्या यशामागे मोदी असून आपण त्यांच्या पाठीशी असल्याचे संकेत तिने दिले. संभाव्य पुणे संघाचे मालक आणि सहाराचे सुब्रतो रॉय यांनीही मोदी यांनी प्रशंसनीय कामगिरी केल्याचे म्हटले आहे.
दरम्यान, आयपीएलचा वाद व त्यासंदर्भात आयकर खात्याकडून सुरू असलेली छापा मोहीम या पार्श्वभूमीवर केंद्रीय अर्थमंत्री प्रणव मुखर्जी, गृहमंत्री पी. चिदंबरम व कृषी मंत्री शरद पवार यांच्यात आज येथे एक महत्त्वपूर्ण बैठक झाली. आयपीएल कोची संघाच्या बोलीवरून निर्माण झालेल्या वादानंतर केंद्रीय परराष्ट्र राज्यमंत्री शशी थरूर यांनी राजीनामा दिला असून आज त्यांनी लोकसभेत निवेदन करून आपली बाजू मांडली. थरूर यांच्या या निवेदनानंतर लगेचच संसद सभागृहात असलेल्या अर्थमंत्री प्रणव मुखर्जी यांच्या चेंबरमध्ये उपरोक्त नेत्यांत जवळपास २० मिनिटे बैठक चालली. या बैठकीत कोणत्या मुद्यांवर चर्चा झाली हे लगेचच कळू शकलेले नसले तरी आयपीएलशी संबंधित जो वाद निर्माण झाला आहे, त्यावरच चर्चा झाली असावी.
पवारांच्या घरी महत्त्वपूर्ण बैठक
तांत्रिकदृष्ट्या आपला आयपीएलशी काही संबंध नाही तसेच आयपीएल समितीचा मी सदस्यही नाही, असा दावा करणाऱ्या शरद पवार यांच्या दिल्लीतील बंगल्यावर आज सकाळी महत्त्वपूर्ण बैठक होऊन त्यात खलबते झाली. त्याच सुमारास खा. सुप्रिया सुळे, पवारांचे जावई सदानंद सुळे, नागरी विमान वाहतूक मंत्री प्रफुल्ल पटेल व महाराष्ट्राचे उपमुख्यमंत्री छगन भुजबळ यांनीही प्रसिद्धी माध्यमांना आमचा आयपीएलशी काही एक संबंध नाही, असे सांगावयास सुरुवात केली.
दरम्यान, बीसीसीआयचे अध्यक्ष शशांक मनोहर आज नागपूरहून येथे आले व त्यांनी शरद पवार यांच्याशी एकू णच आयपीएल प्रकरणावर सविस्तर चर्चा केली. या बैठकीनंतर पवार पत्रकारांशी बोलत होते. ललित मोदींना राजीनामा द्यावा लागेल का, असे विचारले असता पवार म्हणाले, यासंदर्भात आयपीएलची गव्हर्निंग काऊन्सिलच काय तो निर्णय घेईल. सदस्यांच्या मूलभूत अधिकारांत ढवळाढवळ करण्यात शरद पवार वा शशांक मनोहर यांना रस नाही. मंडळाने नेहमीच सामूहिक व सर्वसंमतीने निर्णय घेतलेले आहेत. मग ललित मोदी आयपीएलच्या गव्हर्निंग काऊन्सिलचा निर्णय मान्य करतील का, असे विचारले असता पवार म्हणाले, ललित मोदी हे बीसीसीआयचे उपाध्यक्ष आहेत हे विसरू नका. ललित मोदींसह आम्ही सर्वांनी नेहमीच सामूहिक व सर्वसंमतीने निर्णय घेतलेले आहेत.
मुंबईत होणाऱ्या गव्हर्निंग काऊन्सिलच्या बैठकीत मोदींनाही आमंत्रित करण्यात यावे, असे शशांक मनोहर यांनी सुचविले आहे, असे पवार यांनी सांगितले.