अखेर शशी थरूर यांचा राजीनामा

कोची टीम लिलांव महागात पडला!

नवी दिल्ली, दि. १८ - आयपीएलमध्ये कोची संघाच्या समावेशाबद्दल अधिक रस घेतल्याने वादग्रस्त ठरलेले परराष्ट्र राज्यमंत्री शशी थरूर यांच्यासंदर्भात आज झालेल्या कॉंग्रेस कोअर समितीच्या बैठकीत थरूर यांना मंत्रिमंडळातून डच्चू देण्याचा निर्णय घेण्यात आला, त्यानुसार रात्री पंतप्रधानांनी त्यांना राजीनामा देण्याचा सल्ला दिला.उशिरा मिळालेल्या वृत्तानुसार थरूर यांनी दिलेला राजीनामा मंजुरीसाठी राष्ट्रपतींना सुपूर्द करण्यात आला. मिळालेल्या माहितीनुसार आजच्या बैठकीत केंद्रीय अर्थमंत्री प्रणव मुखर्जी यांनी पंतप्रधान डॉ. मनमोहन सिंग आणि कॉंग्रेस अध्यक्ष सोनिया गांधी यांनी आपण केलेल्या चौकशीचा अहवाल दिला. त्यात कोची संघाच्या लिलावांबाबत थरूर यांनी जादा रस घेतल्याचे व त्यासंबंधातील आर्थिक व्यवहाराशी आपला संबंध नसल्याचे पटवून देण्यात ते अयशस्वी ठरल्याचे म्हटले आहे.
शशी थरूर यांनी आज सकाळी पंतप्रधान डॉ. मनमोहन सिंग यांची भेट घेऊन आपली बाजू स्पष्ट केली होती. थरूर प्रकरण सध्या कॉंग्रेसच्या अंगलट आले आहे. थरूर यांच्या राजीनाम्यासाठी राजकीय पक्षांचा दबाव सतत वाढत होता. कॉंग्रेस पक्षातूनही या विषयावर मतभेद असल्याचे लक्षात आले.काही कॉंग्रेस नेत्यांनाही सतत नवा वाद निर्माण करणारे थरूर मंत्रिमंडळात नको होते. या प्रकरणी गांभीर्याने विचार करण्यासाठी कॉंग्रेसच्या बैठकी सातत्याने सुरू होत्या.
कॉंग्रेस कोर ग्रुपच्या होणाऱ्या बैठकीपूर्वीच आज थरूर यांनी पंतप्रधानांना भेटून आपली बाजू मांडली. पंतप्रधान नुकतेच दोन देशांच्या दौऱ्याहून परतले आहेत. परतल्यानंतर आपण याविषयी निर्णय घेऊ, असे त्यांनी अमेरिकेत असतानाच जाहीर केले होते.
या पार्श्वभूमीवर आज सकाळी थरूर यांनी तातडीने पंतप्रधानांची घेतलेली भेट अतिशय महत्त्वपूर्ण मानली जात होती. तब्बल ४५ मिनिटे चाललेल्या या बैठकीनंतर थरूर पत्रकारांच्या प्रश्नांची उत्तरे न देताच निघून गेले. मात्र, काही प्रसार माध्यम प्रतिनिधींनी जास्तच आग्रह केल्याने थरूर यांनी, पंतप्रधानांनी मागितला तर राजीनामा देणार, असे स्पष्ट केले. याहून अधिक मात्र ते काहीही बोलले नाहीत.
आता प्रवर्तन निदेशनालयाचा ससेमिरा
कोची संघाच्या मालकीच्या वादानंतर आयकर खात्याच्या जाळ्यात अडकलेल्या आयपीएलची आता प्रवर्तन निदेशालय सखोल चौकशी करणार आहे. आयपीएलने संघांचा केलेला लिलाव आणि त्यानंतर करण्यात आलेल्या करारांसंबंधी आयपीएलचे सर्वेसर्वा ललित मोदी यांच्या कार्यालयातून आयकर खात्यातर्फे जप्त करण्यात आलेल्या कागदपत्रांची प्रवर्तन निदेशालय तपासणी करणार आहे. संघांच्या मालकांमध्ये असणाऱ्या विदेशी गुंतवणूकदारांना या चौकशीत विशेष लक्ष्य करण्यात येणार आहे, असे निदेशालयाच्या सूत्रांनी सांगितले आहे.
प्रवर्तन निदेशालय हे अर्थमंत्रालयाचाच एक भाग असून परदेशी चलनासंबंधीच्या कायद्याचे उल्लंघन आणि बेकायदेशीर आर्थिक व्यवहारांवर या विभागाचे लक्ष असते. आयपीएलच्या कागदपत्रांमध्ये यासंबंधीच्या कायद्याचे उल्लंघन झाले असल्याचे निदर्शनास आल्यास त्याची सखोल चौकशी करण्यात येईल, असे निदेशालयाच्या सूत्रांनी सांगितले आहे.
आयकर विभागाने केलेल्या चौकशीतून जी काही माहिती समोर आली आहे ती प्रवर्तन निदेशालयाला कळविण्यात यावी असे खात्याने आयकर विभागाला सांगितले आहे. आयकर विभागाच्या मुंबईतील विशेष तपास पथकाने केलेल्या कारवाईचा अहवाल याआधीच अर्थमंत्रालयाकडे पाठविला आहे.