महागाईविरोधी भाजप मोर्चासाठी ६०० कार्यकर्ते दिल्लीला रवाना

वास्को, दि. १९ (प्रतिनिधी)- गेल्या दोन महिन्यांपासून महागाई विरुद्ध आयोजित आंदोलनानंतर आज गोव्यातून ६०० भाजप कार्यकर्ते दिल्ली येथे २१ एप्रिल रोजी संसदेवरील मोर्चात भाग घेण्यासाठी रवाना झाले. संपूर्ण भारताबरोबरच गोव्यातही जीवनावश्यक वस्तूंच्या दरात आभाळाला टेकणारी अशी वाढ झाल्यामुळे येथील सुमारे २ लाख जनतेने भाजपच्या आंदोलनाला पाठिंबा देत निवेदनावर सह्या केल्या असून मोर्च्यानंतर इतर राज्यांबरोबरच गोव्याचेही निवेदन राष्ट्रपतींना देण्यात येणार आहे.
कॉंग्रेस सरकार अस्तित्वात आल्यानंतर देशभरात जीवनावश्यक वस्तूंच्या दरात आभाळाला टेकणारी अशी वाढ झाल्याने राष्ट्रीय भारतीय जनता पक्षाच्या नेत्यांनी याच्या विरुद्ध आवाज उठवण्यासाठी गेल्या दोन महिन्यापासून आंदोलन सुरू केले आहे. याचाच भाग म्हणून २१ एप्रिल रोजी दिल्ली येथे संसदेवर देशभरातून सर्वच राज्यांतून भाजप कार्यकर्ते मोर्चा नेणार आहेत. इतर राज्यांबरोबरच गोव्यातील कार्यकर्त्यांनीही या आंदोलनात मोठ्या प्रमाणात भाग घेतलेला असून दिल्ली येथे होणाऱ्या मोर्चात सहभागी होण्यासाठी आज गोव्यातून ६०० भाजप कार्यकर्ते (गोव्याच्या वेगवेगळ्या भागांतून) रेलमार्गे दिल्ली जाण्यास रवाना झाले. सदर कार्यकर्त्यांबरोबर प्रदेशाध्यक्ष व आमदार लक्ष्मीकांत पार्सेकर, भाजप सरचिटणीस ऍंड. नरेंद्र सावईकर हे नेते आज निघाले असून उद्या गोव्यातील इतर नेते दिल्लीला जाणार असल्याची माहिती ऍंड. सावईकर यांनी यावेळी दिली. आज पहाटे मडगावहून निघालेल्या मंगला एक्सप्रेस व दुपारी वास्कोहून निघालेल्या गोवा एक्सप्रेस अशा दोन रेल्वेतून सदर भाजप कार्यकर्ते दिल्ली जाण्यास रवाना झाले असून भाववाढीविरुद्धच्या या आंदोलनाला पूर्ण यश मिळेल, अशी खात्री वास्कोहून निघालेल्या कार्यकर्त्यांनी यावेळी व्यक्त केली. पक्षप्रवक्ते राजेंद्र आर्लेकर यांनी आज कार्यकर्त्यांना वास्को रेल्वे स्थानकावर निरोप दिला. गोव्याहून निघालेल्या ६०० भाजप कार्यकर्त्यांपैकी २०० महिला असल्याची माहिती राजेंद्र आर्लेकर यांनी पत्रकारांना दिली. दिल्ली येथे होणाऱ्या मोर्च्यात देशभरातून पाच लाखांहून भाजप कार्यकर्ते उपस्थित राहणार असल्याचे त्यांनी यावेळी सांगितले. आज दुपारी वास्को रेल्वे स्थानकावरून निघालेल्या रेल्वेतून दक्षिण गोवा भाजप उपाध्यक्ष दिगंबर आमोणकर, मुरगावचे माजी नगराध्यक्ष व वास्को भाजप मंडळ अध्यक्ष दीपक नाईक, प्रशांत नार्वेकर, स्वप्निल बांदोडकर, लवू नार्वेकर, शोभा नाईक आदी भाजप कार्यकर्त्यांचा समावेश होता.