उच्च न्यायालयात सुनावणी सोमवारी

पणजी, दि. १६ (प्रतिनिधी) - "नॉट बिफोर मी' असे म्हणून आज मुंबई उच्च न्यायालयाच्या गोवा खंडपीठाचे न्यायाधीश एन. ए. ब्रिटो यांनी पोलिस कोठडीत असलेला माजी मंत्री मिकी पाशेको यांचा जामीन अर्ज सुनावणीसाठी घेण्यास नकार दिला. त्यामुळे मिकींचा अर्ज आता मुंबई न्यायालयाचे न्यायमूर्ती ओक यांच्या समोर येत्या सोमवारी दुपारी ४.३० वाजता सुनावणीसाठी येणार आहे. यापूर्वी एकदा न्यायाधीश ब्रिटो यांनी मिकी यांचा अटकपूर्व जामीन अर्जावर सुनावणी घेण्यास असहमती दाखवली होती.
दक्षिण गोवा जिल्हा न्यायालयाने मिकी यांचा जामीन अर्ज फेटाळून लावल्यानंतर त्यांनी मुंबई उच्च न्यायालयाच्या गोवा खंडपीठासमोर अर्ज सादर केला होता. दरम्यान, काल रात्री अटक करण्यात आलेल्या नादियाची आई सोनिया तोरादो हिलाही सात दिवसांची पोलिस कोठडी मिळवण्यात आली आहे. मिकी यांच्या कायदा सल्लागारानुसार गुन्हा अन्वेषण विभागाने चालवलेल्या चौकशीमुळे नादियाचे कुटुंबीय मानसिक तणावाखाली आल्याचा दावा करण्यात आला आहे. सध्या मिकी आणि सोनिया यांच्यावतीने वकिलांचे एकच पथक न्यायालयात युक्तिवाद करीत आहे.