शेअर बाजारातील मंदीमुळे चार दलालांची आत्महत्या

नवी दिल्ली, दि.१८ : अमेरिकेतील अर्थव्यवस्थेवर आलेल्या संकटामुळे भारतीय शेअर बाजारात आलेल्या मंदीला कंटाळून देशातील चार शेअर दलालांनी आत्महत्या केली आहे. या घटनेमुळे प्रचंड खळबळ उडाली आहे. हैदराबादमध्ये मंदीचा फटका बसलेल्या तीन जणांनी आत्महत्या केली. आत्महत्या करणारे हे तिघेही जण एकाच कुटुंबातील आहे. इंदूरमध्येही एका शेअर दलालाने मंदीचा धक्का सहन न झाल्याने आत्महत्या केली आहे.
भारतीय शेअर बाजारात आलेली मंदी ही अमेरिकेच्या अर्थव्यवस्थेवर आलेल्या संकटाचे पडसाद आहे. परतफेडीची ऐपत नसताना दिलेली गृहकर्जे बुडाल्याने निर्माण झालेल्या आर्थिक संकटाचे परिणाम अमेरिकेत दिसून येत आहे. या बुडीत कर्जामुळे "लेहमन ब्रदर्स' ही १५८ वर्षांची परंपरा असलेली प्रतिष्ठित बॅंक दिवाळखोरीत निघालेली आहे, तर "मेरिल लिंच'या वित्तीय संस्थेचे विसर्जन झालेले आहे. एवढेच नव्हे, तर "एआयजी' (अमेरिकन इंटरनॅशनल ग्रुप )ही विमा कंपनी व "सिटी बॅंक' आर्थिक संकटात सापडलेल्या आहेत. याशिवाय आणखी काही कंपन्यांवर आर्थिक संकट ओढवलेले आहे. या सर्व घडामोडींचे पडसाद सद्यस्थितीत भारतीय शेअर बाजारात उमटलेले आहेत. केवळ भारतीय शेअर बाजारातच नव्हे; तर आशियाई शेअर बाजारांमध्येही मंदीची लाट उसळलेली आहे. त्यामुळे गुंतवणूकदार देखील काळजीत पडलेला आहे. शेअर बाजारात खाल्लेल्या फटक्यांमुळेच चार शेअर दलालांनी कंटाळून आत्महत्या केलेल्या आहेत.
अमेरिकी शेअर बाजारात मोठी घसरण
"अमेरिकन इंटरनॅशनल ग्रुप'(एआयजी)या प्रमुख अमेरिकी विमा कंपनीला दिवाळखोरीपासून वाचविण्यासाठी सरकारी मदत मिळाल्यानंतरही बुधवारी अमेरिकी शेअर बाजारातील घसरण कायमच होती. आणखी काही बॅंका दिवाळखोरीच्या वाटेवर असल्याची भीती गुंतवणूकदारांच्या मनात होती. त्यामुळेच घसरण दिसून आली.
अमेरिकेच्या दोन मोठ्या गुंतवणूकदार बॅंका "गोल्डमॅन सॅक्स ग्रुप' आणि "मॉर्गन स्टॅनले' यांच्या शेअरमध्येही प्रचंड मोठी घसरण झालेली आहे. या दोन बॅंका देखील फार काळ तग धरू शकणार नाहीत, अशी चर्चा सध्या आहे.