कर्नाटक सरकारकडून वेग नियंत्रकांची सक्ती

७० कदंब गाड्यांना यंत्रणा बसवणार
पणजी, दि.१९ (प्रतिनिधी): गोवा सरकारने वेग नियंत्रक कायदा लागू करण्याच्या निर्णयापासून माघार घेतली असली तरी इतर राज्यांनी याबाबत घेतलेल्या पुढाकारामुळे हा नियम लागू करणे सरकारला भाग पडणार आहे.
कर्नाटक सरकारच्या वाहतूक व रस्ता सुरक्षा आयुक्तांनी काढलेल्या एका आदेशान्वये येत्या १ ऑक्टोबरपासून कर्नाटकात सर्व माल व प्रवासी वाहतूक वाहनांना वेग नियंत्रक यंत्रणा बसवणे सक्तीचे केले आहे. ही सक्ती कर्नाटक उच्च न्यायालयाच्या आदेशानुसार करण्यात आली आहे. या आदेशानुसार इतर राज्यांतून कर्नाटकच्या हद्दीत प्रवेश करणाऱ्या सर्व माल व प्रवासी वाहतूक वाहनांना वेग नियंत्रक यंत्रणा बसवणे सक्तीचे ठरणार आहे.
दरम्यान, गोव्यातील कदंब महामंडळाच्या सुमारे ७० बसगाड्यांना ही यंत्रणा बसवण्याची वेळ सरकारवर ओढवली असून येत्या काही दिवसांत ही यंत्रणा बसवली जाईल,अशी माहिती कदंबच्या सूत्रांनी दिली. याहीपलीकडे कर्नाटकातील बेळगाव भागातून गोव्यात मोठ्या प्रमाणात भाजी तथा इतर मालवाहतूक होत असल्याने या वाहनांवरही ही यंत्रणा बसवण्याची वेळ ओढवणार आहे. गोव्यातील सर्व वाहतूकदारांनी या निर्णयाला कडाडून विरोध केला होता. तथापि, आता कर्नाटकने हा निर्णय घेतल्याने राज्यांतर्गत प्रवास करणाऱ्या वाहतूकदारांना ही यंत्रणा आपल्या वाहनांना बसवावी लागणार आहे. कर्नाटकातून गोव्यात मोठ्या प्रमाणात खनिज माल आणला जातो. त्यामुळे त्या वाहनांनादेखील याची कार्यवाही करावी लागेल. दरम्यान, केवळ तीनचाकी सोडून इतर सर्व प्रवासी वाहनांना ही यंत्रणा सक्तीची असल्याने गोवा कर्नाटक व महाराष्ट्र अशी परवानगी घेतलेल्या सर्व वाहनांना ही यंत्रणा बसवावी लागणार आहे. येत्या १ ऑक्टोबरपासून हा कायदा लागू होत असल्याने ही यंत्रणा नसलेल्या वाहनांवर दंडात्मक कारवाई केली जाणार आहे.