शिरसई कोमुनिदादच्या कपाटाच्या चाव्या व कागदपत्रे त्वरित जप्त करण्याचे आदेश

पणजी, दि. १८ (प्रतिनिधी): शिरसई कोमुनिदादच्या कपाटाच्या चाव्या आणि सर्व महत्त्वाची कागदपत्रे रजिस्ट्रार आणि लिपिकाकडे असल्याची माहिती आज न्यायालयात देण्यात आल्यानंतर त्यांच्या घरी जाऊन त्या जप्त करण्याची सूचना कोमुनिदाद प्रशासनाला करण्यात आली. कोमुनिदाद प्रशासन स्वतःचे अधिकार वापरत नसल्याने खंडपीठाने कोमुनिदाद प्रशासनाला चांगलेच फैलावर घेतले. प्रतिवाद्याने यापूर्वी महत्त्वाची कागदपत्रे आणि चाव्या प्रशासनाकडे सुपूर्त केल्याची खोटी माहिती प्रतिज्ञापत्रात सादर केल्याने त्याचाही समाचार घेण्यात आला. प्रतिवाद्याच्या वकिलाने गेल्यावेळी सादर केलेल्या प्रतिज्ञापत्रात महत्त्वाची कागदपत्रे कोमुनिनादच्या कार्यालयात असलेल्या कपाटात असल्याचे म्हटले होते. त्यामुळे न्यायालयाने, काल त्या कपाटाची चावी काढून त्यातील महत्त्वाचा दस्तावेज ताब्यात घेण्याचा आदेश दिला होता. काल सायंकाळी तेथे कोमुनिदाद प्रशासनाचे कर्मचारी ते कपाट उघडण्यासाठी गेले. तेव्हा ते कपाट उघडेच असल्याचे त्यांना दिसून आले. त्यात त्यांना कोणताही कागदपत्रे मिळाली नाहीत. आज याविषयी विचारले असता, ती कागदपत्रे कार्यालयाचे रजिस्ट्रार आणि लिपिकाच्या घरी असल्याचे सांगण्यात आले. त्यामुळे प्रतिवाद्याने गेल्यावेळी प्रतिज्ञापत्रात खोटी माहिती पुरवल्याची गंभीर दखल न्यायालयाने घेतली. त्या लिपिकाच्या घरी जाऊन कागदपत्रे, बॅंक पासबुक, सर्व स्टॅम्प व सील ताब्यात घेण्याचे आदेश न्यायालयाने दिले.
शिरसई कोमुनिदादचे सर्व काम या निवडणुकीत निवडून न आलेला पांडुरंग परब नावाची व्यक्ती पाहत असून त्याने गेल्या दहा वर्षापासून जमीनविक्रीचा कथित गैरप्रकार चालवल्याचा आरोप करून त्यासंदर्भात रत्नाकर लक्ष्मण परब यांनी खंडपीठात याचिका दाखल केली होती. सर्व कागदपत्रे आपण स्वतःहून बार्देश कोमुनिदादच्या कार्यालयात सादर करणार असल्याचे परब याच्या वकिलांनी यापूर्वी खंडपीठाला सांगितले होते.
यावर्षी शिरसई कोमुनिदादची निवडणूक झाली, मात्र मंडळाने या कार्यालयाचा ताबा घेतला नाही. गेल्या दहा वर्षांपासून पांडुरंग परब हाच कामकाज पाहत असल्याने कोमुनादादच्या जमिनींची विक्री करताना मोठ्या प्रमाणात घोटाळा केल्याचा युक्तिवाद याचिकादाराच्या वकिलाने केल्यानंतर, न्यायालयाने या कोमुनिदादचा ताबा प्रशासनाकडे देण्यात आदेश दिला होता.