चौकशी 'सीबीआय'कडे द्या

'एनएसयूआय'नेही दंड थोपटले
पणजी, दि. ९ (प्रतिनिधी): पोलिस ड्रग माफिया प्रकरणात राज्याचे गृहमंत्री रवी नाईक यांचे सुपुत्र रॉय नाईक यांचे नाव लकीच्या मुलाखतीत उघड होताच भारतीय जनता पक्षाबरोबरच आता कॉंग्रेस पक्षाचा विद्यार्थी विभाग "एनएसयूआय'नेही दंड थोपटले असून या संपूर्ण प्रकरणाची "राष्ट्रीय तपास संस्था' किंवा "सीबीआय' मार्फत चौकशी करण्याची मागणी सुनील कवठणकर यांनी आज पणजीत घेतलेल्या पत्रकार परिषदेत केली. तसेच यासंबंधीचे एक निवेदन राज्याचे मुख्यमंत्री दिगंबर कामत यांना देण्यात आले आहे. या प्रकरणात कोणत्याही राजकीय व्यक्तीचे या त्याच्या संबंधित असलेल्या व्यक्तीचे नाव आल्यास त्याचीही सखोल तपास केला जावा, कारण कायद्यापेक्षा कोणीही मोठा नाही, असे यावेळी कवठणकर म्हणाले.
या प्रकरणात काही पोलिस गुंतलेले असून हे प्रकरण काही व्यक्ती दाबण्याचा प्रयत्न करीत आहेत. त्यामुळे कॉंग्रेस पक्षाची प्रतिमा मलिन होत असल्याची टीका श्री. कवठणकर यांनी केली. या प्रकरणाची माहिती पक्षाध्यक्ष सोनिया गांधी व युवा नेते राहुल गांधी यांच्यापर्यंत पोचवली जाणार असल्याचेही त्यांनी यावेळी सांगितले. त्यासाठी आजपासून सह्यांची मोहीम हाती घेण्यात आली असून प्रत्येक महाविद्यालय, उच्च माध्यमिक विद्यालय, राजकीय पक्षाचे सदस्यांच्याही सह्या घेतल्या जाणार असल्याचे त्यांनी यावेळी सांगितले.
ड्रग माफियापेक्षा या व्यवसायात गुंतलेले पोलिस हे महाभयंकर असून त्यांच्यापासून गोव्याला अधिक धोका असल्याची टीका यावेळी "एनएसयूआय'ने केली. ड्रग माफियांना शोधून काढता येते. मात्र आमच्या सुरक्षेच्या व्यवस्थेत राहून ड्रग व्यवसायात गुंतलेल्या या पोलिस अधिकाऱ्यांना शोधून काढणे कठीण आहे. गोव्यात सुरू असलेल्या या ड्रग व्यवसायाच्या विरोधात आम्ही युद्ध पुकारले असून शेवटपर्यंत लढा देणार असल्याचे ते म्हणाले.
ड्रग व्यवहारातून कमवला जाणारा पैसा हा भारताच्या विरोधात युद्ध करण्यासाठी वापरला जात आहे. हा अमली पदार्थ पाकिस्तान आणि अफगाणिस्तान येथून भारतात आणला जातो. या पैशांतून भारताच्या सीमांवर असलेल्या जवानांना मारण्यासाठी गोळ्या तयार केल्या जातात. त्यामुळे गोव्यात हा व्यवसाय करणाऱ्याची कोणत्याही प्रकारे गय करू नये, अशी मागणी त्यांनी केली.
पोलिस ड्रग माफिया प्रकरणाचा तपास काम करणारे पोलिस अधिकारी उपअधीक्षक चंद्रकांत साळगावकर यांनी या प्रकरणाचा बट्ट्याबोळ केला असून हे प्रकरण कोणत्याही स्वतंत्र तपास यंत्रणेकडे सोपवणे गरजेचे आहे. तसेच या प्रकरणाच्या तपासकामात त्रुटी ठेवून संशयितांना मोकळे सोडण्याची सूट देणाऱ्या पोलिस अधिकाऱ्याला त्वरित राष्ट्रीय सुरक्षा कायद्याखाली अटक केली जावी, तसेच त्यांच्या बेनामी मालमत्तेचीही चौकशी केली जावी, अशी मागणी करण्यात आली आहे.
गोव्याच्या महाविद्यालयातही या ड्रग माफियांनी आपले लक्ष केंद्रित केले असून म्हापसा येथील एका महाविद्यालयात ड्रग विकण्याचा प्रकार उघडकीस आला असल्याचे ते म्हणाले. यापूर्वी याच महाविद्यालयाच्या एका सुरक्षा रक्षकाला अमली पदार्थ विक्री करताना रंगेहाथ पकडण्यात आले होते. आता तोच सुरक्षा रक्षक जामिनावर सुटला असून पुन्हा त्याने या महाविद्यालयात ये जा सुरू केली असल्याची माहिती त्यांनी दिली.