मिकी अद्याप बेपत्ताच...!

आज अटकपूर्व जामिनासाठी अर्ज?

पणजी, दि. ६ (प्रतिनिधी) - नादिया तोरादो हिच्या संशयास्पद झालेल्या मृत्युप्रकरणी गुन्हा अन्वेषण विभागाला दुसऱ्या दिवशी येतो म्हणून सांगून गेलेले माजी पर्यटन मंत्री मिकी पाशेको आजही जबाब नोंदवण्यासाठी फिरकले नाही. मिकी दोन दिवस गायब झाल्याने पोलिसांच्या तपासकामाला खीळ बसण्याची शक्यता निर्माण झाली आहे. तसेच, पोलिसांना हा गुन्हा सिद्ध करण्यासाठी हवे असलेले पुरावेही नष्ट होण्याची शक्यताही व्यक्त केली जात आहे.
काल एकाएकी मिकी पाशेको आपल्या मंत्रिपदाचा राजीनामा देऊन भूमिगत झाले होते. तेव्हापासून त्यांचा पोलिस शोध घेण्याचा प्रयत्न करीत असून अद्याप त्यांचा माग लागला नसल्याचे "सीआयडी' सूत्रांनी सांगितले. काल "सीआयडी' कार्यालयात ते फिरकले नसल्याने आज सकाळी जबाब नोंदवण्यासाठी ते हजर राहणार असल्याची वावटळ उडवण्यात आली होती. आजही ते हजर राहिले नसल्याने त्याच्या निकटवर्तीही आता ते आपल्या वकिलांच्या पथकासह उद्या दुपारपर्यंत गुन्हा अन्वेषण विभागात हजर होणार असल्याचे सांगण्यास सुरुवात केली आहे. तसेच, अटकपूर्व जामिनासाठीही मिकी अर्ज करण्याची शक्यता आहे.
दरम्यान, आज सकाळपासून या प्रकरणाच्या तपास अधिकारी सुनीता सावंत यांनी "सवेरा' या महिला संघटनेच्या अध्यक्ष तारा केरकर व "बालयांचो एकवट'च्या आवडा व्हियेगस यांच्या जबान्या नोंदवून घेतल्या. तसेच मयत नादियाची आई सोनिया व दोघा भावांनाही आज गुन्हा अन्वेषण विभागात पाचारण करण्यात आले होते. नादियाची आई सोनिया हिला या प्रकरणाची अनेक गुपिते माहिती असल्याचा "सीआयडी'ला पक्का संशय असल्याने तिने सध्या पोलिस आपला छळ करीत असल्याची भूमिका घेतली आहे. मात्र पोलिसांनी कोणत्याही "आरोपां'कडे लक्ष न देता या प्रकरणात दोषी व्यक्तीचा भांडाफोड करण्यासाठी पुराव्यांच्या शोधासाठी मोहीम हाती घेतली आहे. दुपारी ४ वाजता गुन्हा अन्वेषण विभागाचे एक पथक सोनिया व नादियाच्या दोघा भावांना सोबत घेऊन काही पुरावे गोळा करण्यासाठी गेले होते. परंतु, नेमके त्यांच्या हाती काय लागले हे कळू शकले नाही. या प्रकरणात नादियाच्या घरी काम करणारी मोलकरणीचीही जबानी नोंद करून घेतली जाणार आहे.
आत्महत्या की खून...
नादियाने चुकून रेटॉल घेतले की तिला ते कोणी घेण्यास भाग पाडले, या दृष्टीने सध्या पोलिसांचा तपास सुरू झाला आहे. रेटॉल घेण्याच्या आदल्या रात्री नादिया मिकी पाशेको याच्याबरोबर जेवायला बाहेर गेली होती, अशी माहिती उघडकीस आली आहे. यावेळी काय घडले. त्यानंतर ती घरी परतल्यावर पोट बिघडल्याने झोपली होती, अशीही माहिती उघडकीस आली आहे. दुसऱ्या दिवशी सकाळी तिने दात घासण्याची पेस्ट समजून रेटॉल घेतले होते. त्याच्या तब्बल तीन तासानंतर तिला दवाखान्यात हालवण्यात आले. तिला वैद्यकीय उपचार देण्यास एवढा उशीर का लावला, असाही प्रश्न उपस्थित झाला असून पोलिसांना त्याविषयी नादियाच्या आईशी चौकशी सुरू केली आहे. तसेच, नादियाने विष घेतल्याची माहिती मिळाल्यावर ती माहिती पोलिसांपासून का लपवण्यात आली, त्यासाठी तिच्यावर कोणाचा दबाव होता, याचाही तपास लावला जात आहे.
बायका नाचवणारे लोकप्रतिनिधी नकोत ः तारा केरकर
आम्हाला पहिल्या दिवसांपासून या प्रकरणात मिकी पाशेको यांचा हात असल्याची संशय होता. परंतु, आम्ही त्यांचे नाव उघडपणे घेतले नव्हते. आता त्यानेच या प्रकरणाचा दाखला देत राजीनामा देऊन आपल्या सहभागाला पुष्टी दिली आहे. एक लोकप्रतिनिधी आपल्या पदाचा गैरवापर करून बायका नाचवतो हे अत्यंत निषेधार्थ आहे, अशी टीका "सवेरा' या महिला संघटनेच्या तारा केरकर यांनी केला. "सीआयडी'ने तुमची चौकशी का केली असा प्रश्न पत्रकारांनी केला असता, आम्हाला या प्रकरणाची माहिती कुठून व कशी मिळाली याबद्दल त्यांना जाणून घ्यायचे होते व त्या दिशेने त्यांनी माझा जबाब नोंदवून घेतला असल्याचे सौ. केरकर यांनी सांगितले. सुमारे पाच तास तारा केरकर यांचा जबाब नोंदवून घेण्यात आला. दुपारचे जेवणही त्यांना "सीआयडी'च्याच कार्यालयात देण्यात आले.

मेकॅनिकची चौकशी...
नादिया नेहमी आपले वाहन ज्या गॅरेजमध्ये नेत होती व तिचे वाहन जो मेकॅनिक दुरुस्त करीत होता, त्याचीही आज चौकशी करण्यात आली. "त्या' मेकॅनिकला घेऊन मायणा कुडतरी पोलिस आज दुपारी गुन्हा अन्वेषण विभागात हजर झाले होते. यावेळी त्या मेकॅनिकला बरोबर घेऊन या प्रकरणाच्या तपास अधिकारी निरीक्षक सुनीता सावंत, उपअधीक्षक मोहन नाईक हे अधिक तपासासाठी पोलिस वाहनाने निघून गेले.

नीळकंठ हळर्णकर यांना हिरवा कंदील
मिकी पाशेको यांनी राजीनामा देताच मंत्रिपदासाठी पुढे आलेल्या राष्ट्रवादीचे आमदार नीळकंठ हळर्णकर यांचा नावाला हिरवा कंदील मिळाल्याची माहिती प्राप्त झाली आहे. राष्ट्रवादीचे अध्यक्ष शरद पवार यांनी या नावाबद्दल "ना हरकत दाखला' दिला असून आता केवळ कॉंग्रेस "हायकमांड'च्या दाखल्याची वाट पाहिली जात आहे. तो उद्या सकाळपर्यंत मिळणार असल्याचे सांगितले जात असून उद्या सायंकाळी राजभवनावर नीळकंठ हळर्णकर मंत्रिपदाची शपथ घेण्याची शक्यता व्यक्त केली जात आहे. एकंदरीत परिस्थिती पाहिल्यास हळर्णकर यांना पर्यटन खातेच मिळणार असल्याचे बोलले जात आहे. खाते बदल केल्यास पुन्हा एकदा मंत्रिमंडळात कलह माजण्याची शक्यता असल्याने मुख्यमंत्री खातेबदल करण्याच्या मनःस्थितीत नसल्याचे सूत्रांनी सांगितले. मात्र काही जणांनी पर्यटन खाते आपल्या गळी पाडून घेण्यासाठी जोरदार प्रयत्न सुरू केले आहेत.