"त्या' तलाठ्याला कामावर घेण्यासाठी नेते सक्रिय

मडगाव,दि.१८ (प्रतिनिधी): गेल्या महिन्यात गाजलेल्या व आता मुंबईत गाजू लागलेल्या सिनेस्टार संजय दत्त व मान्यता यांच्या विवाह नोंदणीसाठी आवश्यक असलेला वास्तव्य दाखला बनावट प्रतिज्ञापत्रावर विसंबून दिल्याबद्दल सध्या कामावरून निलंबित असलेला येथील मामलेदार कार्यालयातील तलाठी प्रशांत कुंकळयेकर याला पुन्हा नोकरीत घ्यावे यासाठी संबंधितांवर राजकीय दडपण येत असल्याचे खात्रीलायक वृत्त आहे.
मिळालेल्या माहितीनुसार वास्तव्य दाखल्याची शिफारस केली म्हणून नव्हे तर या एकंदर वास्तव्य दाखला प्रकरणाची भांडाफोड झाल्यावर सदर तलाठ्यावर त्याने जारी केलेल्या या दाखल्यासंदर्भात कारणे दाखवा नोटिस मामलेदारांनी बजावली असता ती घेण्यास त्याने नकार दिला व ती घेऊन गेलेल्यास दुरुत्तरे दिली यास्तव त्याला निलंबित केले गेले होते, तेव्हाच्या त्याच्या उर्मटपणावरून त्याचा कोणीतरी गॉडफादर आहे हे स्पष्ट झाले होते.
त्याच्या नकाराचा अहवाल मामलेदारांनी जिल्हाधिकाऱ्यांना सादर केल्यावर शिस्तभंगाचा ठपका ठेवून त्याला निलंबित केले गेले होते व त्याच्यावरील कारवाई संदर्भात शिफारस करण्यासाठी अतिरिक्त जिल्हाधिकारी प्रसन्न आचार्य यांची एक सदस्यीय समिती नियुक्त करण्यात आली होती.
मिळालेल्या माहितीनुसार आचार्य यांनी सदर कुंकळयेकर याला चौकशीसाठी अनेकदा पाचारण केले पण एकदाही तो हजर झाला नाही की समन्स घेऊन गेलेल्यांकडे तो नीट वागला नाही. त्यांनाही तशीच दुरुत्तरे त्याने दिली. या सर्व बाबी आचार्य यांनी आपल्या अहवालात नमूद केल्या असल्याचे कळते. अहवाल तयार झालेला असून तो बहुतेक उद्या जिल्हाधिकाऱ्यांना सादर केला जाण्याची शक्यता आहे.
हा अहवाल जरी तलाठीविरोधी असला तरी राजकारणी तलाठ्याच्या बाजूने असल्याने व कोणत्याही परिस्थितीत तो कामावर एकदोन दिवसांत हजर व्हावा म्हणून सारी धडपड चालू असल्याने कायद्यावर बोट ठेवून वागणाऱ्या अधिकाऱ्यांची कुचंबणा झालेली पाहायला मिळते.