Goa Doot - Goa's Marathi News

वाहतुकीचा बट्ट्याबोळ
कार्निव्हलची मिरवणूक मोठ्या झोकात काढण्यात आली खरी, तथापि, पणजी शहरात त्यामुळे वाहतुकीचा बट्ट्याबोळ उडाला. पाटो पूल परिसरात वाहनांची कोंडी झाली होती. त्यामुळे कुर्मगतीने वाहतूक पुढे सरकत होती. वाहतूक पोलिसांचे त्यावर कसलेच नियंत्रण नसल्याचे संतापजनक चित्र दिसून आले. त्यामुळे अनेकांना चरफडत आपल्या वाहनांतच बसून राहावे लागले. अखेर जेव्हा ही मिरवणूक संपली तेव्हा कोठे वाहतुकीची कोंडी संपुष्टात आली.
पणजीत "किंग मोमोची' राजवट सुरू
रंगारंग कार्निव्हलमध्ये ९० चित्ररथांचा सहभाग
पणजी, दि.१३ (सांस्कृतिक प्रतिनिधी)- "खा प्या आणि मजा करा,' असा संदेश देत पणजी शहरात आज "किंग मोमो'ने आपल्या चार दिवसीय राजवटीस प्रारंभ केला व त्याचबरोबर रंगारंग कार्निव्हलला सुरुवात झाली. पाटो पूल येथून सायंकाळी ४ वाजता पर्यटक मंत्री मिकी पाशेको यांनी झेंडा दाखवून चित्ररथ मिरवणुकीला सुरुवात झाली. चित्ररथ पाहण्यास असंख्य लोकांनी मांडवीच्या तीरावर गर्दी केली होती. अनेक इमारती, झाडांवर चढून लोकांनी मिरवणुकीचा आनंद लुटला. ९० हून अधिक चित्ररथांचा सहभाग असलेल्या या चित्ररथ मिरवणुकीत विदेशी ललना नृत्यात दंग असलेल्या जास्त प्रमाणात दिसत होत्या. काही चित्ररथ वगळता विविध उत्पादकांच्या जाहिरातींच्या चित्ररथांचा भरणा अधिक होता. दणदणीत संगीत आणि नृत्ये यामुळे वातावरण प्रफुल्लीत झाले होते. मात्र पाटो पूल ते कलाअकादमीपर्यंतच्या मिरवणुकीमुळे वाहतुकीचा पूर्ण खेळखंडोबा झाल्याने घरी परतण्यासाठी कदंब बसस्थानकाकडे जाणाऱ्या लोकांची तारांबळ उडाली. वाहनांची तर जबरदस्त कोंडी झाली होती. त्यात अनेक वाहने अडकून पडल्यामुळे प्रामुख्याने लहान मुलांची खूपच गैरसोय झाली. गोव्यात १५४० साली पोर्तुगीजांनी या उत्सवाला आरंभ केला. आता तर त्याला व्यावसायिक स्वरूप आले आहे. शिवाय कार्निव्हलच्या माध्यमातून पर्यटकांनाही गोव्याकडे आकर्षित केले जात आहे.