पणजी, दि. १५ (प्रतिनिधी): साहित्य अकादमीचा कोकणी भाषेतील अनुवादासाठी देण्यात येणारा पुरस्कार डॉ. कस्तुरी नारायण देसाई यांना जाहीर झाला आहे. महाश्वेतादेवी यांची बंगाली कादंबरी त्यांनी "अधिकार अरण्याचो' या शीर्षकाखाली कोकणीत अनुवादित केली आहे.
साहित्य अकादमीच्या कार्यकारी मंडळाची बैठक काल नवी दिल्लीत झाली. अकादमीचे अध्यक्ष सुनील गंगोपाध्याय हे या बैठकीच्या अध्यक्षस्थानी होते. या बैठकीत भारतातील चोवीस भाषांतील पुरस्कारही निश्चित करण्यात आले.
मराठीत वीणा आलासे यांनी बंगाली भाषेतून मराठीत अनुवादित केलेल्या "तीन आत्मकथा' या साहित्यकृतीला पुरस्कार प्राप्त झाला आहे. हिंदीत भालचंद्र जयशेट्टी यांच्या तर कन्नड भाषेत डी. एल. श्रीनाथ यांना हा पुरस्कार मिळाला आहे.
पन्नास हजार रुपये रोख, शाल व श्रीफळ असे या पुरस्काराचे स्वरूप असून येत्या ऑगस्टमध्ये होणार असलेल्या साहित्य अकादमीच्या एका खास सोहळ्यात विजेत्यांना हे पुरस्कार प्रदान करण्यात येतील.
No comments:
Post a Comment