शशिकलाताईंचा ७ रोजी अमृतमहोत्सवी सत्कार

पवार, स्वराज यांना आमंत्रण
पणजी, दि. २३ (प्रतिनिधी): गोव्याचे भाग्यविधाते भाऊसाहेब बांदोडकर यांच्या कन्या तथा माजी मुख्यमंत्री शशिकलाताई काकोडकर यांच्या अमृतमहोत्सवी वाढदिवसानिमित्त भव्य नागरी सत्कार घडवून आणण्याचा निर्णय आज पणजी येथे झालेल्या बैठकीत घेण्यात आला. राष्ट्रवादी कॉंग्रेसचे राष्ट्रीय अध्यक्ष शरद पवार व भाजपच्या लोकसभेतील विरोधी पक्षनेत्या श्रीमती सुषमा स्वराज यांना या निमित्ताने आमंत्रित करण्याचेही या बैठकीत ठरवण्यात आले.
आज पणजी येथे साहित्य सेवक मंडळ सभागृहात ही खास बैठक बोलावण्यात आली होती. या बैठकीत ताईंचे असंख्य हितचिंतक व समर्थक हजर होते. यावेळी शशिकलाताई काकोडकर अमृतमहोत्सव सत्कार समिती स्थापन करण्यात आली. मगोचे नेते तथा वाहतूकमंत्री सुदिन ढवळीकर यांची या समितीच्या अध्यक्षपदी एकमताने निवड करण्यात आली. उपाध्यक्षपदी विरोधी पक्षनेते मनोहर पर्रीकर, खासदार श्रीपाद नाईक, माजी केंद्रीय कायदामंत्री ऍड. रमाकांत खलप, मगोचे अध्यक्ष पांडुरंग राऊत, आमदार दीपक ढवळीकर आदींची निवड करण्यात आली. मुख्य सचिवपदी ऍड. नारायण सावंत, सहसचिव मोहन वेरेकर, खजिनदार लवू मामलेकर व सहखजिनदार परेश रायकर आदींचा यात समावेश आहे. या समितीवर अन्यही अनेकांची नावे असून प्रत्यक्ष त्यांची मान्यता घेतल्यानंतरच ती जाहीर केली जातील, असेही यावेळी सांगण्यात आले.
येत्या ७ जानेवारी रोजी हा सत्कार सोहळा कांपाल मैदानावर आयोजित करण्याची समितीची योजना असून येत्या काळात समितीच्या बैठकीत त्यावर शिक्कामोर्तब केले जाईल, अशी माहिती देण्यात आली. बैठकीचे समन्वयक म्हणून पत्रकार सागर जावडेकर यांनी काम पाहिले.