कळणेतील खनिजावर हसापूर येथे प्रक्रिया

यंत्रणेची जाणीवपूर्वक डोळेझाक
पणजी, दि. २१ (प्रतिनिधी): पेडणे तालुक्यातील हसापूर येथे एका खाजगी जागेत महाराष्ट्रातील दोडामार्ग तालुक्यातून मोठ्या प्रमाणात बेकायदेशीररीत्या खनिज मालाचा साठा केला जात असल्याचा प्रकार उघडकीस आला आहे. याठिकाणी कच्चा खनिज माल साठवून त्यावर प्रक्रिया केली जाते व त्यानंतर हा माल चढ्या दराने विकला जातो, अशीही खबर आहे. दरम्यान, हसापूर गावात एवढ्या मोठ्या जागेत उघडपणे हा बेकायदा व्यवहार सुरू असताना स्थानिक पंचायत, खाण खाते, पोलिस खाते व गोवा प्रदूषण नियंत्रण मंडळ अनभिज्ञ कसे काय, असा सवाल येथील ग्रामस्थ करीत आहेत. या व्यवहाराला राजकीय आशीर्वाद असल्याचा संशयही व्यक्त होत आहे.
या प्रकरणी मिळालेल्या माहितीनुसार, पेडणे तालुक्यातील धारगळ येथे हसापूर गावात गेल्या एका वर्षापासून मोठ्या प्रमाणात खनिज मालाची साठवणूक केली जात असल्याचा प्रकार उघडकीस आला आहे. हा खनिज माल शेजारील दोडामार्ग तालुक्यात सुरू झालेल्या खाणींवरून आणला जात असल्याचा संशय आहे. अलीकडेच दोडामार्ग येथील कळणे येथे खाणी सुरू झाल्याने तेथील खनिजाची मोठ्या प्रमाणात गोव्यात वाहतूक केली जाते. दरम्यान, ही जागा काहीशी अडगळीत असल्याने व तिथे घरे नसल्याने रात्रीचा या ठिकाणी माल आणून टाकला जातो व या मालावर प्रक्रिया करून नंतर तो विकला जातो.
या प्रकरणी हसापूरचे सरपंच संतोष मळीक यांच्याशी संपर्क साधला असता त्यांनी सदर जागा गावातीलच धनंजय मळीक नामक एका व्यक्तीची असल्याची माहिती दिली. धनंजय मळीक यांनी ही जागा अन्य कुणाला तरी भाडेपट्टीवर दिली आहे. गेल्या वर्षी पंचायतीतर्फे सदर व्यक्तीला सुनावण्यात आले होते व हा व्यवहार बंद करण्याचे आदेशही दिले होते. परंतु, त्याचा काहीही उपयोग झाला नाही, असेही ते म्हणाले. ग्रामस्थांचा या व्यवहाराला विरोध असल्याची माहितीही त्यांनी दिली. पंचायतीकडून या व्यवहाराला कोणताही दाखला किंवा परवाना देण्यात आला नाही, असेही त्यांनी यावेळी स्पष्ट केले. या बाबतीत अन्य काही ग्रामस्थांशी संपर्क साधून माहिती मिळवली असता, ही जागा दिलेल्या कुटुंबातील एक महिला पंचायत सदस्य असल्याचे सांगण्यात आले, त्यामुळे पंचायतीकडून या बेकायदा व्यवहारावर कारवाई होण्याची शक्यता फारच कमी असल्याचे यावेळी सांगण्यात आले. या व्यवहाराला पाठिंबा मिळवून देण्यासाठी या व्यवहाराशी संबंधित काही लोकांनी सदर व्यवसाय करणाऱ्या व्यक्तीकडून देवस्थानच्या नावे पैसे मिळवून संपूर्ण गावातील लोकांची बोलतीच बंद करण्याचे प्रयत्नही सुरू असल्याची खात्रीलायक खबर मिळाली आहे.