वास्कोत महिलेला ९० हजारांना लुबाडले

वास्को, दि. १० (प्रतिनिधी): साडीला काहीतरी लागल्याचे सांगू महिलेला ९० हजार रुपयांना लुबाडण्याचा प्रकार आज शहरातील मोक्याच्या ठिकाणी घडल्याने पोलिसांची झोप उडाली आहे. याविषयी अधिक माहितीनुसार आज दुपारी १ वाजण्याच्या सुमारास ही घटना घडली. सरस्वती दिवाकरन (५२, रा. साळकर कॉलनी वाडे) या महिलेला येथील एचडीएफसी बॅंकेसमोर एका युवकाने साडीला मागून काहीतरी लागल्याचे सांगितले. तिने आपली बॅग खाली ठेवल्याची संधी साधून युवकाने तिच्या बॅगसह पलायन केले. सदर महिलेने इंडियन ओव्हरसीज बॅंकेतून ४० हजार तर बॅंक ऑफ इंडियातून ५० हजार काढले होते, ते पैसे या बॅगमध्ये ठेवण्यात आले होते. वास्को पोलिसांनी कलम ३७९ खाली गुन्हा नोंदवला असून अज्ञाताचा शोध सुरू केला आहे. वास्को पोलिस स्थानकाचे प्रमुख उपनिरीक्षक जिवबा दळवी यांच्या मार्गदर्शनाखाली उपनिरीक्षक जॉन डिसोझा पुढील तपास करत आहेत.