मारहाणीच्या जाचातून त्या लहानग्याची सुटका

महिलेस अटक, नवरा फरारी
पणजी, दि. ५ (प्रतिनिधी) : खोर्जुवे येथील एका अल्पवयीन मुलाचा छळ होत असल्याच्या "गोवादूत'मध्ये प्रसिद्ध झालेल्या वृत्ताची दखल घेऊन म्हापसा पोलिसांनी आज दुपारी कुशे येथे त्या कुटुंबाच्या बिऱ्हाडावर धडक दिली. पोलिसांनी मेलीस फर्नांडिस हिला अटक केली असून तिचा अल्पवयीन भाऊ मिंगेल याला ताब्यात घेतले आहे.
याबाबत मिळालेल्या माहितीनुसार, "गोवादूत'मधील वृत्ताच्या अनुषंगाने पणजी येथील "चिल्ड्रन्स राइट्स इन गोवा' या संघटनेच्या सुषमा, आशिष व सरिता यांनी म्हापसा पोलिसांशी संपर्क साधला व या वृत्तासंबंधात कोणती कारवाई करणार आहात, अशी विचारणा केली. म्हापसा पोलिसांनी लगेच हालचाल करून कुशे खोर्जुवे येथे जाऊन तपास केला असता, मारहाण करणाऱ्यांपैकी मेलीस हिचा नवरा लपून राहिला असल्याचे त्यांना समजले. पण, त्या ठिकाणी मिंगेल हा मारहाणीमुळे त्रस्त असलेला तिचा भाऊ सापडला. त्याला ताब्यात घेतल्यावर त्याने दिलेल्या माहितीनुसार मेलिसा हिला अटक करण्यात आली. मिंगेल याच्या तपासणीत त्याच्या शरीरावर अनेक ठिकाणी जखमा असल्याचे तसेच लोखंडी तारेचे व्रण व सिगरेटचे चटके लावल्याचे दिसून आले. त्याला बराच मुका मार बसल्याचेही आढळले, अशी माहिती पोलिसांनी दिली. वैद्यकीय तपासणीत मिंगेल याचा हात फ्रॅक्चर झाल्याचे स्पष्ट झाले आहे. बालहक्क कायद्यानुसार मेलिसा व तिच्या नवऱ्याविरुद्ध गुन्हा नोंदविण्यात आला आहे. फरारी नवऱ्याचा शोध घेतला जात आहे, असे पोलिसांनी सांगितले.
गेल्या आठवड्यात एका निनावी फोनवरून या प्रकारासंबंधी पोलिसांना माहिती मिळाली होती. त्यावेळी म्हापसा पोलिसांनी संबंधित जोडप्याला बालहक्क कायद्याची जाणीव करून दिली होती तसेच परिणामांचीही कल्पना दिली होती, असे पोलिसांनी सांगितले. मिंगेल याचा या दांपत्याने छळ केल्याचे स्पष्टपणे दिसत असल्याचे पोलिसांनी सांगितले. त्याची वैद्यकीय तपासणी करून, पुढील कारवाई केली जाणार आहे. याप्रकरणी निरीक्षक मंजुनाथ देसाई अधिक तपास करीत आहेत.
दरम्यान, मेलिसा हिने आपल्या घरी न सांगताच आपला भाऊ मिंगेल याला पळवून आणले होते व त्याला खोर्जुवे येथे बिऱ्हाडात ठेवून त्याचा छळ केला जात होता, अशी माहिती मिळाली. आज "गोवादूत'मधील मिंगेलचा फोटो पाहून त्याचा पत्ता मिळाल्याने त्याच्या आईवडिलांनी खोर्जुवे येथे धाव घेतली व त्याला घरी नेण्याची तयारी दर्शविली. तथापि, आता पोलिस कारवाईनंतरच त्याबाबत निर्णय घेतला जाणार आहे. मेलिसा व तिच्या नवऱ्याविरुद्ध दक्षिण गोव्यात काही तक्रारी नोंद झाल्या असल्याने पोलिसांचा ससेमिरा वाचविण्यासाठी हे दाम्पत्य या खेडेगावात राहायला आले असावे, असा अंदाज आहे.