'स्लमडॉग...'ला आठ ऑस्कर

-देशभरात आनंदाची लाट
-रहमानला दोन ऑस्कर
-गुलजारही मानकरी
-राष्ट्रपती, पंतप्रधानांकडून अभिनंदन
-'स्माईल पिंकी'ही पुरस्कृत
लॉस एंजिलीस, दि. २३ : मुंबईतील पार्श्वभूमीवर तयार करण्यात आलेल्या "स्लमडॉग मिलेनिअर' या चित्रपटाने पुरस्कार मिळविण्याचा सपाटा कायम ठेवीत चित्रसृष्टीतील सर्वोच्च समजल्या जाणाऱ्या ऑस्करमध्ये बक्षिसे अक्षरश: लुटली. लॉस एंजिलीस येथे आज झालेल्या समारंभात दोन ऑस्कर पटकावून संगीतकार ए.आर. रहमान आंतरराष्ट्रीय स्तरावर पोहोचले असून, संवेदनशील आणि कल्पक गीतकार गुलजार यांनी "जय हो' गाण्यासाठी पहिला ऑस्कर मिळविला आहे. दहा नामांकने मिळालेल्या "स्लमडॉग...'ने त्यापैकी आठ श्रेणीतील पुरस्कार पटकाविले आणि सर्वाधिक ऑस्कर मिळविणारा चित्रपट म्हणून सर्वत्र कौतुकाची थाप मिळविली आहे. विशेष म्हणजे, हा जगज्जेता चित्रपट विकास स्वरूप या भारतीय लेखकाच्या लेखणीतून साकारलेल्या "क्यू ऍण्ड ए' या पुस्तकावर आधारित आहे.