मडगाव, दि. २५ (प्रतिनिधी): कोलवा पंचायतीतील बेकायदा बांधकाम पाडण्यास गेलेल्या सरकारी अधिकारी व पोलिस पथकाला संबंधित बांधकामकर्त्याने स्वतःस पेटवून घेण्याचा प्रयत्न केल्यामुळे आणि त्यातून तेथे मोठा जमाव जमल्यामुळे तणाव निर्माण झाला. तथापि, मोठ्या प्रमाणात पोलिस बंदोबस्त घेऊन गेलेल्या विशेष पथकाने अर्धेअधिक बांधकाम त्यापूर्वीच जमीनदोस्त केले होते.
या कारवाईसाठी बुलडोझरचाही वापर झाला.शिवाय अग्निशामक दलही सज्ज ठेवले होते. मान्युएल फर्नांडिस यांचे हे बांधकाम असून ते पाडण्याचा आदेश पंचायत संचालकांनी गेल्या १८ फेब्रुवारी रोजी दिला होता. तशी नोटिस त्यांना गेल्या रविवारी दिली होती. नोटिस मिळाल्यानंतर त्यांनी सोमवारी पंचायत संचालकांच्या निवाड्याविरुध्द उच्च न्यायालयात याचिका गुदरली असली तरी त्याबाबतची माहिती पंचायत वा गटविकास अधिकारी यांना दिली नाही.
त्यामुळे आज सरकारी अधिकाऱ्यांचे पथक सर्व तयारीनिशी त्याने केलेले विस्तारीत बांधकाम पाडण्यासाठी आल्यावर त्यांनी कारवाईस विरोध केला. आपण न्यायालयात याचिका दाखल केली असून त्यावरील सुनावणी होईपर्यंत थांबा व नंतर कारवाई करा, अशी विनंती काहींनी अधिकाऱ्यांना केली. जवळचे रहिवासीही या कारवाईविरुध्द उभे ठाकले. तथापि, कडक पोलिस बंदोबस्तामुळे त्यांचे काहीच चालले नाही. सदर बांधकामात कच्च्या तसेच पक्क्या बांधकामाचा समावेश होता. त्यातील निम्मे बांधकाम पाडले गेले असता सदर मान्युएल पळत आले व सोबत आणलेले केरोसीन अंगावर ओतून आपली पत्नी मारिया हिला कोलीत आणून आपल्याला लाव असे सांगू लागले. त्यामुळे गडबडलेल्या पोलिसांनी त्यांना ताब्यात घेतले.
त्याचवेळी तेथील काहींनी चुडत व कचऱ्याला आग लावल्याने स्थिती आणखी चिघळून नये म्हणून संबंधितांनी कारवाई रहीत केली.
Subscribe to:
Post Comments (Atom)
No comments:
Post a Comment