खनिज वाहतुकीविरोधात उद्रेक

धारबांदोडा-कुडचडे मार्गावरील वाहतूक संतप्त जमावाने रोखली


कुडचडे, दि. २५ प्रतिनिधी : बेफाम खनिज वाहतूक प्रकरणी तोडगा काढण्यासाठी केप्याचे उपजिल्हाधिकारी किर्लपाल दाभाळ पंचायतीत दुपारी ३ वाजता बोलावलेली बैठक पंचायतीला नोटीस पाठवून ऐनवेळी रद्द करून ती केपे जिल्हाधिकारी कार्यालयात बोलावल्याने संतप्त झालेल्या सुमारे ६०० जणांच्या जमावाने धारबांदोडा दाभाळ कुडचडे मुख्य रस्त्यावरील संपूर्ण वाहतूक बंद केली. उपजिल्हाधिकारी व सरकारी अधिकारी लोकांशी चर्चा करेपर्यंत यापुढेही रस्तारोको करण्याचे लोकांनी ठरवले आहे. संतप्त जमावाने रस्त्यावर दगड व झाडे कापून आणि टायरना आग लावली. तसेच अनेक वाहने पंक्चर केली.
काल दुपारी सुमारे दीड वाजता सावरगाळ येथील सोमनाथ इंग्लिश हायस्कूलचे इयत्ता ९ वीच्या वर्गात शिकणारे संगम शिवराम बांदेकर व विशेष ऊर्फ मयूर दामोदर गावकर हे १४ वर्षीय विद्यार्थी भरवेगाने येणाऱ्या ट्रकच्या चाकाखाली सापडून जागीच ठार झाले होते. त्यांच्यासोबत दुचाकी चालवणारा विनोद वासू चणेकर हा त्यांचा सहकारी जखमी झाला होता. आज त्याच्या प्रकृतीमध्ये थोडी सुधारणा झाल्याचे सांगण्यात आले.
या पार्श्वभूमीवर, दाभाळ भागातून बेफामपणे हाकल्या जाणाऱ्या वाहतुकीवर निर्बंध घालून योग्य कारवाई केल्याशिवाय मृतांना घटनास्थळपासून हलवू देणार नसल्याचे जमावाकडून सांगताच केप्याचे पोलिस उपअधीक्षक रोहिदास पत्रे यांनी सांग्याचे मामलेदार पराग नगसेकर यांच्यासह आज दि. २५ रोजी दुपारी ३ वाजता केपे उपजिल्हाधिकाऱ्यांसहकिर्लपाल दाभाळ पंचायतीत बैठक आयोजिली होती.
ऐनवेळी बैठक रद्द
त्यानुसार सुमारे ६०० ग्रामस्थ पंचायतीत हजर झाले होते. तथापि, दुपारी १.३० च्या सुमारास केपे मामलेदारांनी उपजिल्हाधिकारी कार्यालयातून नोटीस पाठवून सदर नियोजित बैठक रद्द करून दुपारी ३ वाजता ती केपे उपजिल्हाधिकारी कार्यालयात बोलावण्यात आल्याचे सांगितले. त्यामुळे लोक संतापले.
उपजिल्हाधिकारी पंचायतीत येऊन जनतेशी चर्चा करेपर्यंत संपूर्ण वाहतूक बंद करून रास्ता रोको करण्याचा निर्णय लोकांनी घेतला. या रास्तारोकोत भाग घेण्यासाठी किर्लपाल दाभाळ पंचायतीसमोर कोडली तिस्क, दाभाळ, सांतोण, कळसई, तळप, वाघोण, सादगाळ, कामरखंड, भांडोळ, करमणे आदी भागातील शेकडो लोकांसोबतसरपंच रामा गावकर, सावर्डे जिल्हा पंचायत सदस्य प्रदीप देसाई, पंच सुकांती गावकर, रमेश वेळगेकर, मोहन गावकर, प्रकाश नाईक, सोमनाथ इंग्लिश हायस्कूलचे मुख्याध्यापक गिरीश तेंडुलकर, "पीपल फॉर नेचर केअर'चे अध्यक्ष राजेश गावकर आदी उपस्थित होते.
त्यानंतर अवघ्या काही तासांपूर्वीच ताबा घेतलेल्या केपे उपजिल्हाधिकारी प्रशांत शिरोडकर यांनी जमावाला शांत करत धारबांदोडा दाभाळ ते कुडचडे मुख्य रस्त्यावर सकाळी ७ ते ८ व दुपारी १ ते २ दरम्यान संपूर्ण मालवाहतूक ट्रक खाणीच्या आत रोखून ठेवण्यात येणार असल्याचे आश्वासन दिले. यामुळे आता दाभाळ कुडचडे मुख्य रस्त्यावर कोणत्याच प्रकारचे ट्रक दुपारच्या वेळेला उभे करण्यात येणार नसून याचे कटाक्षाने पालन करण्यात येणार असल्याचे सांगण्यात आले. पहाटे ४ पासून सुरू होणारी मालवाहतुकीवर लवकरच निर्बंध घालण्यासाठी येत्या ८ दिवसांत ग्रामस्थांसोबत चर्चा करण्यात येणार असल्याचे सांगण्यात आले.
जमावाने सारी वाहतूक रोखल्याने जनशक्तीपुढे अखेर शासनाला नमावे लागले. दरम्यान
उपजिल्हाधिकारी शिरोडकर, सांगे मामलेदार पराग नगर्सेकर, संयुक्त मामलेदार आशुतोष आपटे, रोहिदास पत्रे, कुडचडेचे पोलिस निरीक्षक राजू राऊत देसाई, फौजफाट्यासह तसेच कुडचडे अग्निशामक दलाचे जवान हजर झाले. त्यांना जमावाने घेराव घातला.
काल दुर्घटनेनंतर पत्रे यांनी सर्व जमावाच्या उपस्थितीत किर्लपाल दाभाळ पंचायतीत बैठक घेण्याचे जाहीर केले होते. मात्र, आज संध्याकाळी सभा रद्द केल्यामुळे जमावाने त्यांना जाब विचारताच आपण बैठकीसंबंधी कोणाशीच बोललो नसल्याचे ते म्हणाले. त्यामुळे जमाव संतप्त झाला.
उपजिल्हाधिकाऱ्यांची बदली
कालच्या दुर्घटनदरम्यान केपे उपजिल्हाधिकारी ताबा घेतलेल्या शबरी मांजरेकर यांची आज दुपारी १२ वाजता तातडीने दुसरीकडे बदली करण्यात आली व गेल्या १५ दिवसापूर्वीच मडगावात पंचायत उपसंचालकपदाचा ताबा दिलेले प्रशांत शिरोडकर यांची केपे उपजिल्हाधिकारी पदी नेमणूक करण्यात आली. यावेळी शिरोडकर यांनी काही तासांतच या पदाचा ताबा घेऊन थेट दाभाळ येथे जमावाला भेट दिली.
आजच्या या घटनेला खाण लॉबीच जबाबदार असल्याचा आरोप ग्रामस्थांनी केला.
दरम्यान, मंगळवारी दुपारी ट्रकाखाली चिरडून घटनास्थळीच ठार झालेल्या संगम बांदेकर व विशेष ऊर्फ मयूर यांच्यावर वाघोण गावात शोकाकूल वातावरणात अंत्यसंस्कार करण्यात आले.