सुखराम यांना आज शिक्षा सुनावणार

नवी दिल्ली, दि. २४ : माजी पंतप्रधान पी.व्ही.नरसिंहराव यांच्या कार्यकाळात केंद्रीय मंत्री राहिलेल्या सुखराम यांच्याविरुद्धच्या बेहिशेबी मालमत्ता प्रकरणी शिक्षेचा निर्णय न्यायालयाने उद्यापर्यंत राखून ठेवला आहे.
सीबीआयच्या विशेष न्यायालयाने बेहिशेबी मालमत्ता प्रकरणी सुखराम यांना आधीच दोषी ठरविले आहे. न्यायालयात आज शिक्षेची सुनावणी होणार होती. सीबीआयने न्यायालयाकडे सुखराम यांना जास्तीत जास्त सात वर्षांची शिक्षा देण्याचा आग्रह केला होता. सीबीआयचे विशेष वकील गुरुदयाल सिंग यांनी सीबीआयचे विशेष न्यायाधीश व्ही.के.माहेश्वरी यांच्यापुढे बाजू मांडताना सांगितले की, भारत सरकारचे मंत्री म्हणून कार्यरत असताना सुखराम यांनी सर्व माया जमविली होती. त्यामुळे त्यांना जास्तीत जास्त शिक्षा व्हायला हवी.
यावर ८२ वर्षीय सुखराम यांचे वकील एस.पी.मिनोचा यांनी केंद्रीय मंत्र्यांचे वय, आरोग्य, मंत्री तसेच राजकारणी असतानाची चांगली प्रतिमा आदी बाबी लक्षात घेऊन शिक्षा सुनावण्यात यावी, अशी मागणी केली. दोन्ही बाजूंचे युक्तिवाद ऐकल्यानंतर न्यायाधीशांनी शिक्षेच्या अवधीवरील आपला निर्णय राखून ठेवला. आता बुधवारी यावर सुनावणी होणार आहे.
सुखराम यांच्यावर बेहिशेबी मालमत्ता बाळगल्याप्रकरणी भ्रष्टाचारविरोधी कायद्यांतर्गत गुन्हा दाखल झाला आहे. सीबीआय न्यायालयाने त्यांना या प्रकरणी आरोपीही सिद्ध केले आहे.
--------------------------------------------------------------------
संसदेतही दुमदुमले 'जय हो'
नवी दिल्ली, दि. २४ : मुंबईच्या धारावी झोपडपट्टीवर आधारित असलेल्या "स्लमडॉग मिलेनियर' या चित्रपटाला आणि त्यातील योगदानासाठी गुलजार, ए.आर.रहमान आणि रसुल पुकुट्टी यांना मिळालेल्या ऑस्कर पुरस्कारांचा जयघोष आज संसदेच्या दोन्ही सभागृहात दुमदुमला. संसदेने सर्व विजेत्यांचे अभिनंदन केले.
लोकसभेत बोलताना सभापती सोमनाथ चॅटर्जी म्हणाले की, या तीन भारतीय कलाकारांचे यश प्रत्येक भारतीयाच्या मनात उत्साह भरणारे ठरले आहे. देशाला त्यांच्या यशावर गर्व आहे. त्यांच्याइतकाच आनंद "स्माईल पिंकी' या लघुपटाच्या यशाचाही आहे. या शुभेच्छा संदेशांचा शेवट सोमनाथदांनी "जय हो' अशा जयकाराने केला.
राज्यसभेतही अध्यक्ष हामिद अन्सारी यांनी सभागृहाच्या वतीने सर्व विजेत्यांचे अभिनंदन केले.
--------------------------------------------------------------------