लाखाहून अधिक भाविकांनी घेतले श्रीसाई पादुकांचे दर्शन

आज दुपारी आरतीनंतर श्रीपादुकांचे प्रस्थान
पणजी, दि. २२ (प्रतिनिधी) - साईबाबांच्या चावडी पूजनाच्या शताब्दीनिमित्त आज येथील काम्पाल मैदानावर आयोजित सोहळ्यात गोवा, महाराष्ट्र व कर्नाटक राज्यातील सुमारे १ लाख भाविकांनी अतिशय श्रद्धापूर्वक साईबाबांच्या पादुकांचे दर्शन घेतले. या पादुका उद्या दुपारपर्यंत दर्शनासाठी ठेवण्यात आल्या असून, दुपारी १२ वाजता आरतीनंतर त्यांचे पुढे प्रस्थान होईल.
काल मध्यरात्रीपासूनच श्रीपादुका दर्शनासाठी साईभक्तांच्या भल्यामोठ्या रांगा लागल्या होत्या. पहाटेच्या काकड आरतीने या सोहळ्यास प्रारंभ झाला. या काकड आरतीच्या वेळी मुख्यमंत्री दिगंबर कामत यांनी सपत्नीक श्रीपादुकांची विधिवत पूजा केली. या आरतीला उद्योजक श्रीनिवास धेंपे व आरोग्यमंत्री विश्वजीत राणे सपत्नीक उपस्थित होते. तसेच उत्तर गोव्याचे खासदार श्रीपाद नाईक, आमदार पांडुरंग मडकईकर, बाल भवनच्या अध्यक्ष विजयादेवी राणे, आयोजन समिती व शिर्डी संस्थानचे पदाधिकारी, सदस्य व अन्य स्वयंसेवक, कार्यकर्ते उपस्थित होते.
त्यानंतर श्रीस्तवन मंजिरी व साई चरित्रातील ३७ व्या अध्यायाचे वाचन झाले. दुपारी १२.३० वाजल्यापासून महाप्रसादाला प्रारंभ झाला. अंदाजे ७० हजार भाविकांनी या महाप्रसादाचा लाभ घेतला. भाविकांच्या सोयीसाठी घरी नेण्यासाठी शिर्डी येथून एक लाडू व उदीची व्यवस्था करण्यात आली होती.
सकाळच्या सत्रात झालेल्या सांस्कृतिक कार्यक्रमामध्ये सकाळी चिन्मय मिशन ग्रुपच्या निरीक्षा पै काणे यांनी स्वागत गीत म्हटले. या स्वागतपर कार्यक्रमात किरण आणि रितू कित्तूर यांनी नृत्य सादर केले. अभिषेक बांदेकर यांनी भजन सादर केले. भक्तीसंगीत कार्यक्रमात रजनी ठाकूर व स्थानिक गोमंतकीय कलाकारांनी आपली कला सादर केली. दुपारी १२ वाजता मध्यान्ह आरती झाली.
शिर्डीत खास निवासस्थान
सायंकाळच्या सत्रात झालेल्या साईभक्ती संमेलनात मुख्यमंत्री श्री. कामत व शिर्डी संस्थानचे विश्वस्त तथा कॉंग्रेसचे स्थानिक आमदार जयंत ससाणे यांची भाषणे झाली. श्री. ससाणे यांनी शिर्डी येथे गोमंतकीय साईभक्तांसाठी निवासस्थान उभारण्याची अनुकूलता दर्शविली व देशातील विविध राज्यांतून संस्थानाचे माहिती केंद्रे उभारणार असल्याची माहिती दिली. यावेळी श्री. कामत यांनी, लवकरच गोमंतकात माहिती केंद्र उभारण्यावर कार्यवाही करण्याच आश्वासन दिले. या संमेलनात त्यांच्यासोबत व्यासपीठावर पिंगुळी येथील संत प.पू. अण्णा राऊळ महाराज, गोव्याच्या माजी मुख्यमंत्री शशिकलाताई काकोडकर, माजी केंद्रीयमंत्री ऍड्. रमाकांत खलप, श्रीसाई संस्थान शिर्डीचे विश्वस्त डॉ. एकनाथ गोंडकर, सुरेश वाबळे व अशोक खांबेकर, शैलेश कुंटे, शिर्डीच्या माजी नगराध्यक्षा सौ. राजश्री ससाणे, दर्शन सोहळा समितीचे अध्यक्ष अनिल खवंटे, रवी नायडू, सचिव प्रदीप पालयेकर, खजिनदार विवेक पार्सेकर, पणजी पालिका महापौर टोनी रॉड्रिगिस, मुस्तफा कादर, उपस्थित होते. कार्यक्रमाच्या सुरुवातील मान्यवरांच्या हस्ते दीपप्रज्वलन झाले. त्यानंतर गोव्यातील दर्शन सोहळा समितीच्या पदाधिकाऱ्यांचा श्रीसाई संस्थानाच्या पदाधिकाऱ्यांमार्फत श्रीसाई नामाची शाल, श्रीफळ व साई प्रतिमा भेट देऊन सन्मान करण्यात आला. तर श्रीसाई पादुका गोमंतकीयांच्या दर्शनासाठी उपलब्ध करुन दिल्याबद्दल मुख्यमंत्री श्री. कामत यांच्यासह समितीच्या पदाधिकाऱ्यांनी संस्थानाच्या पदाधिकाऱ्यांचा शाल, श्रीफल व विशेष भेटवस्तू देऊन सन्मान केला. शिर्डीच्या नगरसेवकांनी मुख्यमंत्री श्री. कामत यांचा विशेष सत्कार केला. कार्यक्रमाचे सूत्रसंचालन हिंदी चित्रपटसृष्टीतील प्रसिद्ध अभिनेते श्री. अमन वर्मा व डॉ. अजय वैद्य यांनी केले. या संमेलनात श्री. खवंटे यांनी स्वागतपर भाषण केले. यावेळी व्यासपीठावरील इतर मान्यवरांची भाषणे झाली. शेवटी समितीचे खजिनदार श्री. पालयेकर यांनी आभार मानले.
सायं. ६ च्या धूप आरतीनंतर "भजन संध्या'मध्ये प्रसिद्ध गायिका अनुराधा पौडवाल, प्रसिद्ध पार्श्वगायक मनोहर उधास, अनुपम देशपांडे व श्री. प्रमोद मेधी यांनी भक्तीगीते सादर करुन श्रोत्यांची मने भारावून टाकली. प्रसिद्ध अभिनेते श्री. सुधीर दळवी व अमन वर्मा यांनी या कार्यक्रमाचे उत्कृष्ट सूत्रसंचालन केले. १९७७ साली "शिर्डी के साईबाबा' या हिंदी चित्रपटात साईबाबांची भूमिका साकारणारे श्री. दळवी यांनी त्या भूमिकेनंतर त्यांच्यात झालेल्या बदलाविषयी श्रोत्यांना माहिती दिली. त्यानंतर रात्री ९ वाजता पं. सदानंद नयमपल्ली यांचा संगीत कार्यक्रम झाला. १० वाजता बाबांची सेज आरती झाली. त्यानंतर रात्रौ ११ वाजता अंतरराष्ट्रीय कलाकार सच्चिदानंद अप्पा यांनी आपली कला सादर करुन श्रोत्यांना मंत्रमुग्ध केले.