कार्निव्हलचा जल्लोष सुरू

पणजी, दि. २१ (प्रतिनिधी): ठेका धरायला लावणारे संगीत, दिलखेचक नृत्ये, आकर्षक चित्ररथ, व्हिवा कार्निव्हलचा जल्लोष, पर्यटक व स्थानिकांची प्रचंड गर्दी अशा भारलेल्या वातावरणात आज मांडवीच्या तीरी पणजी कार्निव्हल महोत्सवाला सुरुवात झाली.
"खा प्या मजा करा" असा संदेश देणाऱ्या "किंग मोमो' ची "राजवट' आता सुरू झाली असून पर्यटन विभागातर्फे आयोजित पणजी कार्निव्हलमध्ये ७७ चित्ररथांनी सहभाग घेतला.
राज्यपाल एस एस. सिद्धू व मुख्यमंत्री दिगंबर कामत यांनी कार्निव्हल उत्सवाच्या चित्ररथ मिरवणुकीचे बावटा दाखवून उद्घाटन केले. यावेळी पर्यटनमंत्री मिकी पाशेको, पर्यटन विकास महामंडळाचे अध्यक्ष श्याम सातर्डेकर, महापौर टोनी रॉड्रिगीस, यंदाचे "किंग मोमो" आयव्हर अँथनी ब्रागांझा उपस्थित होते.
यंदाच्या चित्ररथ मिरवणुकीत अश्लीलतेला कात्री लावल्याचे प्रामुख्याने जाणवले. गेल्यावेळी ब्राझिलीयन "सांबा" नृत्याचा आस्वाद घेतलेली अनेक मंडळी तशा नृत्याचा शोध घेत होती. तथापि, त्यावर जोरदार टीका झाल्यामुळे यंदा तशा स्वरूपाचे नृत्य दिसून आले नाही.
विविध संदेश देणारे व रंगीबेरंगी चित्ररथ पाहण्यासाठी लोकांची झुंबड उडाली होती.
"खा प्या मजा करा' या किंग मोमोच्या संदेशाच्या पुरेपूर फायदा उठवत काही मद्यालयांनी रस्त्यावरच टेबल्स टाकून बीअरची विक्री केली. त्यामुळे वाहतुकीचा बट्ट्याबोळ झाला, पण वाहतूक पोलिसांनी त्याची फारशी दखल न घेतल्याने लोकांना धड चालणेही कठीण बनले होते.
या महोत्सवात अनेक पारंपरिक, व्यावसायिक, सास्कृंतिक चित्ररथ तथा नृत्य गटांनी भाग घेतला. कर्णकर्कश विदेशी संगीताच्या तालावर थिरकणारी युवापिढी व अनेक मुखवट्याव्दारे मनोरंजन करणारे कलाकार यामुळे उपस्थितांचे चांगलेच मनोरंजन झाले.
यात युवा वर्गाची संख्या प्रकर्षाने जाणवत होती. गर्दीत काही मोजके विदेशी पर्यटक सोडल्यास देशी पर्यटकांची मोठ्या प्रमाणात हजेरी होती. या महोत्सवाला अश्लीलतेचे गालबोट लागणार नाही याची सरकारने गंभीर दखल घेतल्याचे प्रामुख्याने जाणवले. कारण त्याबाबत अनेक सामाजिक संघटनांनी हरकती घेतल्या होत्या. परिणामी काही तुरळक प्रकार वगळता अनेक कलाकारांनी आपला "ड्रेस कोड" कमी जास्त प्रमाणात सांभाळल्याचे दिसत होते. कार्निव्हल चित्ररथ मिरवणुका उद्यापासून राज्यात मडगावसह अन्य महत्त्वाच्या शहरांत काढण्यात येणार आहेत.