कसाब समुद्रमार्गाने भारतात आला नाही पाकी नौदल प्रमुखांचा दावा

'मुंबई हल्ल्यामागे भारतीय नौदलाचा नाकर्तेपणा'
इस्लामाबाद, दि. २७ : मुंबईवर हल्ला करणाऱ्यांपैकी पकडण्यात आलेला एकमेव जिंवत आरोपी कसाब हा पाकिस्तानातून समुद्रमार्गाने भारतात आल्यासंदर्भात कोणतेही ठोस पुरावे नसून भारतीय नौदल आपल्या सागरी सीमांचे रक्षण करण्यात अपयशी ठरले. ते आपल्या अपयशाचे खापर पाकवर फोडू पाहात असल्याचा उलट आरोप पाकिस्तानचे नौदल प्रमुख ऍडमिरल नौमान बशीर यांनी केला आहे.
नेहमीप्रमाणे आपले दोष झाकून पाकने पुन्हा एकदा भारतावरच दोषारोपण केले आहे. एका पत्रपरिषेदत बोलताना पाकचे नौदल प्रमुख म्हणाले की, कसाब मुंबईवर हल्ला करण्यासाठी समुद्र मार्गाने आल्याचा दावा भारताने केला आहे. अगदी हल्ल्याच्या दिवशीपासून भारत असेच म्हणत आहे. पण, प्रत्यक्षात तो पाकमधून समुद्र मार्गाने भारतात शिरल्याचा कोेणताही ठोस पुरावा सापडलेला नाही. आपल्या देशाच्या सागरी सीमांचे संरक्षण करण्याची जबाबदारी नौदलाची असते. भारतीय नौदल आपल्या सागरी सीमांचे रक्षण करू शकले नाही. त्यांच्या नाकर्तेपणामुळेच मुंबई हल्ला घडून आला, असेही ऍडमिरल नौमान बशीर म्हणाले.
जर अतिरेकी समुद्र मार्गाने आले यात तथ्य असेल तर भारतीय नौदल काय करीत होते, हा मोठा प्रश्न उभा राहतो. भारतीय नौदल तर आमच्या नौदलाहून १२ पटीने मोठे आहे. असे असताना त्यांच्या नजरेतून इतकी मोठी बाब कशी सुटली, असा सवालही त्यांनी केला.
हे सर्व पाहता भारताने आमच्यावर आरोप करू नये. यावर आता आम्ही जास्त काहीच बोलणार नाही. भारताने आपले आरोप सुरूच ठेवले तर समुद्र मार्गाने अतिरेकी शिरत असताना भारतीय नौदल काय करीत होते, या प्रश्नाचेही उत्तर भारताला द्यावे लागेल, असे पाकी नौदलप्रमुख म्हणाले.
भारताने आरोप फेटाळले
कसाब पाकिस्तानातून समुद्र मार्गाने भारतात आला असल्याचे पुरावे नसल्याचा दावा करणाऱ्या पाकिस्तानी नौदल प्रमुखांचे सर्व आरोप भारताने फेटाळले असून पाकिस्तानने आरोप-प्रत्यारोप करण्यापेक्षा दिलेल्या पुराव्यांवर कारवाई करावी, असा सल्लाही दिला आहे.
गृहमंत्री पी.चिदम्बरम यांनी आज पाकिस्तानी नौदल प्रमुख ऍडमिरल नौमान बशीर यांच्या आरोपांना ताबडतोब रोखठोक उत्तर दिले. पाकी नौदल प्रमुखांनी कसाब पाकिस्तानातून समुद्रमार्गे आला नसल्याचे म्हटले. याला ताबडतोब उत्तर देताना केंद्रीय गृहमंत्री म्हणाले की, आम्ही पाकिस्तानला मुंबई हल्ल्याच्या संदर्भात सर्व सबळ पुरावे दिलेले आहेत. पाकने या पुराव्यांच्या अनुषंगाने कारवाई करणे अपेक्षित आहे. आता तर मुंबई हल्ल्यातील आरोपपत्रही दाखल झाले आहे. साडेअकरा हजार पानांच्या या आरोपपत्रात पाकिस्तानच्या सर्व प्रश्नांची उत्तरे आहेत. त्यामुळे आता आम्ही पाकला काहीही स्पष्टीकरण देणार नाही. त्यांनी आपली उत्तरे या आरोपपत्राच्या माध्यमातून शोधावी आणि दिलेल्या पुराव्यांच्या आधारे कारवाई करावी, एवढीच आमची अपेक्षा राहील. भारतावर उलटपक्षी आरोप करणे आता पाकने बंद केले पाहिजे, अशी तंबीही चिदम्बरम यांनी दिली आहे.
सुरक्षा दल सज्ज
मुंबई हल्ल्यानंतर आता देश अधिक जागरूक आणि शस्त्रसज्ज झाला आहे. आता देशावरील कोणत्याही संकटाचा निकराने मुकाबला करण्यास भारतीय लष्कर सज्ज असल्याचे गृहमंत्री म्हणाले.
जेव्हा गरज पडेल तेव्हा राष्ट्रीय सुरक्षा संघटनांना तातडीने ३० ते ४० मिनिटांत विमान आणि हेलिकॉप्टर्स उपलब्ध करून दिले जातील, अशी ग्वाहीदेखील चिदम्बरम यांनी दिली.