कळंगुटमध्येही दुकान फोडले १.९५ लाखांच्या इलेक्ट्रॉनिक वस्तू चोरल्या

म्हापसा, दि. २६ (प्रतिनिधी)- मडगावात चोऱ्यांची मालिका सुरू असतानाच कळंगुट नायकावाडा येथे "फोकस वर्ल्ड' या इलेक्ट्रॉनिक आस्थापनातील १ लाख ९५ हजार रुपयांचे साहित्य काल रात्री अज्ञातांनी लंपास केले. आस्थापनातील हॅन्डीकॅम्प, डिजिटल कॅमेरा, व्हिडिओ शूटिंग कॅमेरा अशा अत्याधुनिक व महागड्या वस्तू चोरट्यांनी लांबवल्या.
आज सकाळी दुकान उघडले असता आतील बऱ्याच वस्तू चोरीला गेल्याचे आढळून आले. नंतर सुशीलकुमार भालजी यांनी कळंगुट पोलिसांत तक्रार नोंदविली. कळंगुट पोलिस उपनिरीक्षक गौतम साळुंखे यांनी श्वानपथक व ठसेतज्ज्ञांना पणजीहून पाचारण केले. तथापि, त्याचा काहीच उपयोग झाला नाही. रात्री पावसाचा जोर वाढत असल्याने चोरीचे प्रकारही वाढत आहेत.
मृतदेह सापडला
दरम्यान, हणजूणे येथे एका खाणीत अज्ञात महिलेचा मृतदेह आढळला आहे. तिचे वय ३० ते ४५ दरम्यान असावे, अशी शक्यता पोलिसांनी व्यक्त केली. साहाय्यक उपनिरीक्षक श्याम नाईक यांनी मृतदेहाचा पंचनामा केला असून उत्तरीय तपासणीसाठी तो "गोमेकॉ'त पाठविला आहे.