संशयावरून हटकलेल्या दोघांकडे सापडल्या दुर्मीळ प्राचीन मूर्ती

मडगाव, दि. ३ (प्रतिनिधी): मडगाव पोलिसांनी आज भल्या सकाळी येथील जुन्या रेल्वे स्टेशनजवळ संशयास्पद स्थितीत फिरणाऱ्या दोघांना ताब्यात घेऊन त्यांची झडती घेतली असता त्यांच्यापाशी अत्यंत दुर्मीळ अशा २२ प्राचीन मूर्ती सापडल्या. त्या जप्त करण्यात आल्या आहेत.
पोलिस निरीक्षक राजेंद्र प्रभुदेसाई यांनी सांगितले की, त्यांची नावे भोलानाथ यादव व विजयकुमार अशी असून ते उत्तर प्रदेशमधील आहेत. त्यांची कसून चैाकशी केली असता त्यांचे आणखी तिघे साथीदार असल्याचे आढळून आले आहे. पोलिस त्यांच्या मागावर आहेत. या संशयितांकडून आणखीही अशाच स्वरूपाची चोरीची प्रकरणे उजेडात येण्याची शक्यता आहे. त्या दिशेने पोलिस तपास सुरू आहे.
या मौल्यवान मूर्ती आपण कोलवा येथील काश्मीरींच्या दुकानांतून चोरल्याचे या दोघांकडून सांगण्यात आले. तथापि, पोलिस त्यावर विश्वास ठेवण्यात तयार नाहीत. अधिक तपास सुरू आहे.