कोलवा परिसरात मलेरियाचा फैलाव

मडगाव, दि. ३० (प्रतिनिधी): कोलवा भागात तेथील बांधकाम कामगारांच्या वाढत्या झोपड्यांमुळे तेथे मलेरियाची प्रकरणे वाढल्याच्या तक्रारी आल्या नंतर त्यांची गंभीर दखल सासष्टीचे मामलेदार परेश फळ देसाई यांनी घेतली व तेथील सरपंच तसेच नगरनियोजन, आरोग्य व सार्वजनिक बांधकाम या सरकारी खात्यांच्या अधिकाऱ्यांची बैठक बोलावून चर्चा केली.
त्यांनी संबंधितांना हे प्रकरण सहजावारी नेऊ नका असे बजावतानाच तेथील जागांना प्रत्यक्ष भेट देऊन पहाणी करण्याची सूचना केली. तक्रारीत तथ्य असेल व परिस्थिती गंभीर असेल तर बांधकामे बंद ठेवण्याचा आदेश जारी करा व झोपडया काढून टाका असेही मामलेदारांनी बजावले. आरोग्य खात्याने यासंदर्भात सतर्क रहाण्याची गरज प्रतिपादताना बांधकामांवरील कामगारांकडे आरोग्य कार्डे आहेत काय ते तपासा व नसल्यास संबंधित ठेकेदाराविरुध्द गुन्हा नोंदवा अशी सूचना त्यांनी केली.