गोवा एक्सप्रेसचे इंजिन घसरले

अहमदनगर, दि. ४ : दिल्लीहून गोव्याकडे निघालेल्या गोवा एक्सप्रेसचे इंजिन आज दुपारी नगर स्थानकात रूळावरून घसरले. सुदैवाने या अपघातात जीवितहानीचे वृत्त नाही.या रेल्वेस्थानकात सध्या रूळांच्या दुरुस्तीचे काम सुरू आहे. दुपारी १ वाजताच्या सुमारास ही गाडी स्थानकात प्रवेश करीत असताना तिच्या इंजिनाची पुढील दोन चाके रूळावरून घसरली. रेल्वे कर्मचाऱ्यांनी तातडीने मदतकार्य सुरू केले आहे. इंजिन पुन्हा रूळावर घेण्यासाठी दौंड येथून क्रेन मागविण्यात आली. तोवर येथील वाहतूक खोळंबली होती. याचा परिणाम इतर गाड्यांच्या वेळापत्रकावरही झाला.