धारबांदोडा अपघातात दुचाकीस्वार मृत्युमुखी

फोंडा, दि.८ (प्रतिनिधी): प्रतापनगर धारबांदोडा येथे आज सकाळी पावणे सहाच्या सुमारास मोटर सायकलला (जीए ०९ एफ ३१२५) झालेल्या अपघातात दुचाकीस्वार प्रसाद प्रकाश पावसकर (१९ वर्षे, रा.दयानंदनगर) मरण पावला.
सकाळी प्रसाद पावसकर दुचाकीवरून दयानंद धारबांदोडा येथून तिस्क उसगाव येथे व्यायामशाळेत जात असताना वाटेत प्रतापनगर येथे खराब रस्त्यामुळे त्याच्या दुचाकीला अपघात झाला. वाहनावरून घसरून पडल्यामुळे त्यात तो गंभीर जखमी झाला होता. त्याला तात्काळ १०८ रुग्णवाहिकेतून बांबोळी येथील सरकारी हॉस्पिटलमध्ये दाखल करण्यात असता तेथे उपचार सुरू असताना तो सकाळी ११.३० च्या सुमारास मरण पावला. प्रसाद पावसकर कुटुंबीयांचा एकुलता एक मुलगा होता. त्याच्या अपघाती निधनामुळे पावसकर कुटुंबीयांना जबर धक्का बसला आहे. निरीक्षक सी. एल. पाटील यांच्या मार्गदर्शनाखाली उपनिरीक्षक दीपक पेडणेकर, हवालदार किशोर नाईक यांनी पंचनामा केला.