काटे-गिर्दोळी येथे भिंत कोसळून महिला ठार

मडगाव, दि. २ (प्रतिनिधी): गेल्या दोन दिवसांत या भागात अतिवृष्टीने दिलेल्या तडाख्यात अनेक ठिकाणी डोंगराचे कडे कोसळले, रस्त्यावर झाडे उन्मळून वाहतुकीस अडथळा आला तर काटे- गिर्दोळी येथे आज सकाळी एका जुन्या घराची भिंत कोसळून रुमाल्दिया गोन्साल्वीस (५०) ही महिला चिरडून ठार झाली. पोलिसांनी घटनास्थळी जाऊन तो मृतदेह ढिगाऱ्यातून बाहेर काढून शवचिकित्सेसाठी पाठविला.
गोन्साल्वीस कुटुंबाने नवे घरे बांधलेले आहे पण तरीही जुने घर मोडक्या अवस्थेत तसेच होते. सोसाट्याच्या पावसाने पाणी भिंतीत झिरपून ती कोसळली तेव्हा भिंतीजवळ रुमाल्दीया गोन्साल्वीस उभी होती.अचानक भिंत तिच्यावर कोसळली व त्या खाली सापडून ती चेंगरली गेली. आपत्कालीन व्यवस्थापन समितीने मामलेदारांना वृत्त देऊन घटनास्थळी पाठविले.त्यांनी पाहणी करून अहवाल सादर केला आहे.
राय, लोटली, माजोर्डा व करमणे येथे पावसाबरोबर आलेल्या वाऱ्यामुळे असंख्य झाडे उन्मळून पडली व त्यामुळे अग्निशामक दलाला धावपळ करावी लागली, त्यांनी जाऊन ती कापून काढली तर काणकोण येथे अनेक बागायतींची दगडी कुंपणे व संरक्षक भिंती कोसळल्याचे वृत्त आहे.