'कॉंबिंग ऑपरेशन'अंतर्गत विदेशींसह मजुरांनाही अटक

म्हापसा, दि. ८ (प्रतिनिधी): ओरिसातील "माओवादी त्रिशूल मजदूर मंच'चा जहाल नक्षलवादी शंभू बेक यास गोव्यात अटक केल्याच्या पार्श्वभूमीवर म्हापसा आणि हणजूण पोलिसांनी "कॉंबिंग ऑपरेशन'अंतर्गत काल रात्री सुमारे १५५ विदेशी नागरिकांना अटक करून आज (शनिवारी) त्यांची सुटका करण्यात आली. त्याचप्रमाणे करासवाडा व अन्य भागात भाड्याने राहणाऱ्या १३५ मजुरांनाही अटक केली.
अटक करण्यात आलेल्या या सर्वांच्या घर मालकांनी पोलिसांना संबंधित भाडेकरूंचा तपशील पुरवला नव्हता. त्यामुळे त्यांना अटक करण्यात आली. पोलिसांनी आता सर्व तपशील मिळवला आहे. काही दिवसांपूर्वी सिरसई येथील एका अल्पवयीन मुलीला फूस लावून पळवून नेण्यात आले होते. त्यावेळी तक्रार नोंदवण्यास गेलेल्या कुटुंबाकडे भाडेकरू म्हणून ठेवलेल्या व्यक्तीचे छायाचित्र वा अन्य कोणतीच माहिती उपलब्ध नव्हती. त्यामुळे या प्रकरणातील संशयिताला पकडणे पोलिसांना कठीण बनले. तसेच दिवसेंदिवस चोरी, दरोडे, घरफोड्या वाढत चालल्या आहेत. हे सुरू असतानाच जहाल नक्षलवादी शंभू बेक गोव्यात वास्तव्य करून असल्याचे प्रकरण उजेडात आल्यावर आणखीनच खळबळ माजली होती. त्याला दोन दिवसांपूर्वी कोलवाळ येथे अटक करण्यात आली होती. त्यासाठीच पोलिसांनी खबरदारीचा उपाय म्हणून हे कॉंबिंग ऑपरेशन हाती घेतले आहे. म्हापशाचे पोलिस उप-अधीक्षक सॅमी तावारिस यांच्या मार्गदर्शनाखाली निरीक्षक राजेश कुमार आणि हणजूणेचे पोलिस निरीक्षक मंजुनाथ देसाई यांनी आपल्या सहकाऱ्यांच्या साथीत ही कारवाई केली.