वास्कोला पावसाचा दणका

25 घरांची पडझड, चौघे जखमी
वास्को, दि. 26 (प्रतिनिधी)- वाढत्या उष्णतेमुळे त्रस्त झालेल्या जनतेला दिलासा देत वास्को परिसरात आज सकाळी दोन तास मुसळधार पाऊस पडला खरा; पण त्यामुळे बिर्ला जुवारीनगर येथील सुमारे 25 घरांची पडझड झाली. तसेच पावसात खेळत असलेल्या तीन मुलांसह एका पादचाऱ्यावर पत्रे पडल्याने ते जखमी झाले. त्यापैकी एका मुलाची प्रकृती गंभीर असून त्याला बांबोळी येथे "गोमेकॉ' इस्पितळात दाखल करण्यात आले आहे.
बिर्ला जुवारीनगर येथे सुमारे 500 घरे असून तेथे सुमारे दोन हजार रहिवासी राहातात. आज सकाळी ज्यावेळी पाऊस पडू लागला, त्यावेळी वाऱ्याने पाच घरांचे पत्रे उडाले, हे पत्रे अन्य 20 घरांवरून गेल्याने त्या घरांचीही पडझड झाली. त्यापैकी दहा घरांची मोठ्या प्रमाणात हानी झाल्याचे दिसून आले. यावेळी पावसात खेळत असलेली काही मुले पत्रे पडल्याने जखमी झाली, त्यापैकी मंजुनाथ व्यंकटेश (8), यासिन शेख (8), अरुण चव्हाण (10) व पादचारी युनुस शेख (27) हे जखमी झाले आहेत. जखमींना येथील कुटीर रुग्णालयात दाखल करण्यात आले असता, गंभीर जखमी झालेल्या अरुणला "गोमेकॉ'त हलवण्याचा सल्ला डॉक्टरांनी दिला. इतरांना प्रथोमपचारानंतर घरी पाठविण्यात आले. अरुण यांची प्रकृती गंभीर असल्याची माहिती पोलिसांनी दिली. स्थानिक आमदार माविन गुदिन्हो यांनी घटनास्थळी भेट देऊन विचारपूस न केल्याने रहिवाशांनी नाराजी व्यक्त केली.
दरम्यान, अजूनही गटारे उपसण्यात न आल्याने पावसामुळे प्रभाग क्रमांक 14 व 9 मध्ये मोठ्या प्रमाणात रस्त्यावर पाणी साचल्याचे दिसून आले. मेस्तावाडा येथे अनेकांच्या घरांत पाणी शिरले. नगरसेवक मनीष आरोलकर यांनी नगराध्यक्षांच्या अकार्यक्षमतेवर टीका करताना, तेच या स्थितीला जबाबदार असल्याचे सांगितले. सांडपाणी घरात शिरल्याने सर्वत्र दुर्गंधी पसरल्याने लोक पहिल्याच पावसात त्रस्त बनल्याचे चित्र दिसले.