कॅसिनो धनिकांच्या चैनीसाठीच

लोकहो, कॉंग्रेस नेत्यांना धडा शिकवा - फोन्सेका
पणजी, दि. 28 (प्रतिनिधी) - राज्यातील "आम आदमी' चे सरकार म्हणवणारे मुख्यमंत्री दिगंबर कामत सामान्यांच्या प्रश्नांकडे दुर्लक्ष करून धनिक व उद्योगपतींचे चोचले पुरवण्यात दंग आहेत. राज्यासमोर अनेक जटिल प्रश्न आ वासून उभे असताना धनिकांचे लाड पुरवणाऱ्या "कॅसिनो' जुगारी जहाजांना परवानगी देण्यात व्यस्त नेत्यांना आता जनतेनेच धडा शिकवावा, असे आवाहन कामगार नेते ख्रिस्तोफर फोन्सेको यांनी केले आहे.
गोव्यातील अनेक धनाढ्य राजकीय नेते "कॅसिनो' जुगाराचे चाहते आहेत. या नेत्यांच्या वरदहस्तामुळेच गोव्यात "कॅसिनो' सुरू करण्यासाठी विविध कंपन्यांत स्पर्धा चालू आहे. या धनाढ्य लॉबीला विरोध करून आंदोलने जरी केली तरी शेवटी सरकारच त्यांची बाजू घेत असल्याने काहीही साध्य होत नाही, असे फोन्सेका यांनी सांगितले.
प्रादेशिक आराखडा 2011 विरोधात गोवा बचाव अभियानाचे आंदोलन झाले व हा आराखडा रद्द करण्यात आला. आता नवा आराखडा तयार करताना या संस्थेला कृती दलात समावेश केल्यानंतर आपलाच सहभाग असतानाही कृती दलाच्या अंतरिम अहवालास विरोध करण्याची कृती विचित्रच म्हणावी लागेल असेही फोन्सेको यांनी स्पष्ट
केले.
"कॅसिनो' म्हणजे धनिकांच्या जुगाराचा अड्डा. तेथे काळा व पांढऱ्या पैशांचा संगम होतो. कॅसिनोंत जुगारावर उधळणारा पैसा कोठून येतो हा सवाल सरकारला पडला नसून त्यांनी शुल्क भरले की काम भागले ही मनोवृत्ती सरकारची आहे. खोल समुद्रात नांगरून व्यवसाय करण्याचे कायदेशीर बंधन असूनही येथील मांडवी नदीत मोकाट फिरणारे हे "कॅसिनो' येथील युवा पिढीला खुणावतात. केवळ धनिकांच्या चैनीची सोय करणाऱ्या सरकारातील नेत्यांनी येथील बेरोजगार युवकांना रोजगार देण्याची आधी सोय करावी. इथे पाणी,वीज या गोष्टी लोकांना मिळत नाही. कचऱ्याची विल्हेवाट लावण्यासाठी कोणतीही योजना सरकारकडे नाही व तो प्रश्न सोडवण्यासाठी सरकारला वेळही नाही हे दुर्भाग्य असल्याचे ते म्हणाले.
पणजी व पर्वरी येथे एका संस्थेतर्फे कॅसिनो जहाजातील जुगाराची यंत्रे कशी वापरावी याबाबत प्रशिक्षण वर्ग सुरू आहेत. आता हे प्रशिक्षण पूर्ण झाल्यावर या लोकांना गोव्यातील कॅसिनोवरच नोकऱ्या दिल्या जाणार असल्याने बाहेरून काहीही भासवले असले तरी आतमध्ये या व्यवसायाची पूर्ण तयारी सुरू असल्याचा गौप्यस्फोट फोन्सेका यांनी केला. या व्यवसायात काही स्थानिक उद्योगपतींचाही सहभाग आहे. मांडवी नदीत सध्या बार्जेससाठी जागा अपुरी पडत असल्याने त्यात नव्या "कॅसिनो' जहाजांचा भरणा झाल्यास जलमार्गावरही कोंडी होण्याची शक्यता आहे. गोव्यातील सामान्य जनता भरडत असताना गोवा हे धनिक व श्रीमंत लोकांच्या मौजमस्तीचे ठिकाण असल्याचा भास निर्माण करण्यासाठी धडपडत असलेल्या आपल्या नेत्यांना अद्दल घडवण्याची नितांत गरज आहे. गोवेकांरांना आपला गोवा नक्की कसा हवा हे आता निश्चितपणे ठरवण्याची गरज असून तसे न झाल्यास या लाटेत गोवेकर कधी वाहून जातील हे कळणारही नाही, असा इशाराही फोन्सेका यांनी दिला.