निवडणूक युती राहणार नसल्यानेच केंद्राकडून सीबीआयचा ससेमिरा : मिकी

मडगाव, दि. १३ (प्रतिनिधी): विदेशात बेकायदा पद्धतीने माणसे पाठविणे तसेच हवाला व्यवहाराच्या कथित आरोप प्रकरणी सीबीआय चौकशी सुरू झाल्याने त्रस्त बनलेले माजी पर्यटनमंत्री मिकी पाशेको यांनी, आपणामागे सीबीआय चौकशीचा ससेमिरा लावून देण्यामागे केंद्र सरकार असल्याचा आरोप केला असून आगामी निवडणुकात गोव्यातील सत्ताधारी युती टिकण्याची शक्यता नाही, असा अहवाल आयबीने सादर केल्यानंतरच हे चौकशीचे आदेश दिले गेले आहेत,असा दावा केला आहे.
गेल्या आठवड्यातील अमेरिकेतील व्हाईटहाऊसमधील सूत्रांचा हवाला देऊन प्रसिद्ध झालेली वृत्ते व त्यानंतर सीबीआय व नंतर आयकर अधिकाऱ्यांनी निवास व कार्यालयांवर छापे टाकून केलेल्या चैाकशीनंतर प्रथमच जाहीर कार्यक्रमात सहभागी झालेल्या माजी पर्यटनमंत्र्यांनी आपले सर्व व्यवहार कायदेशीर व पारदर्शी आहेत व त्याबाबतची सारी माहिती आपण संबंधित अधिकाऱ्यांना दिली आहे. सत्य काय ते बाहेर आल्यावर आपला या कथित प्रकरणाशी काहीच संबंध नाही ते दिसून येईल. आपणास त्रासदायक ठरणाऱ्याला खिंडीत पकडून त्याची, सतावणूक करायची ही कॉंग्रेसची जुनी कार्यपद्धत आहे व तिचा वापर सध्या आपणाविरुद्ध चालू आहे, ते म्हणाले.
कोलवा येथे आयोजित केलेल्या प्लास्टिकविरोधी मोहिमेला बावटा दाखवून त्यांनी प्रथम शुभारंभ केला व नंतर बाणावली येथे एका आंतरप्रभाग फुटबॉल स्पर्धेच्या अंतिम सामन्याला उपस्थिती लावली. यावेळी त्यांच्यासमवेत त्यांचे बाणावलीतील संभाव्य उमेदवार डॉ. ह्युबर्ट गोमीश, सरपंच कार्मेलीना फर्नांडिस,मॅथ्यू दिनीज, नावेलीतील संभाव्य उमेदवार आवर्तानो फर्नांडिस हेही उपस्थित होते.
गोव्यातील राजकीय स्थितीबाबतचा आयबी अहवाल दिल्लीत पोचल्यापासून केंद्र आपणास लक्ष्य बनवू लागलेले आहे व सदर सीबीआय चौकशीचे आदेश हा त्याचाच एक भाग आहे, असा आरोप माजी पर्यटनमंत्र्यांनी केला व म्हटले की पण अशा चौकशीची आपणास पर्वा नाही कारण शेवटी गोव्यातील लोकांनाच काय तो निर्णय घ्यावयाचा आहे. याप्रकरणी कोणाकडूनही तक्रार आलेली नसताना चौकशीच्या नावाखाली चाललेली सतावणूक कुणालाही कळण्यासारखी आहे. यास्तव लोकांनीच शेवटी आमदार व सरकार याबाबत काय तो निर्णय घ्यावयाचा आहे. सीबीआय चौकशीबाबत काहीही सांगण्याचे त्यांनी टाळले व सांगितले आपण स्वच्छ असल्याचे आपणास ठाऊक आहे.आपण अमेरिकेत २३ वर्षे घालवलेली आहेत व आर्थिक बाबीसंदर्भात आपण कोणतेच गैरकृत्य केलेले नाही. शेकडो गोमंतकीयांना आपण तेथे रोजगारासाठी पाठवले ते देखील संपूर्ण कायदेशीरपणे, पण त्यांना जर आपण काही बेकायदेशीर केले आहे, असे वाटत असेल तर परिणामांना तोंड देण्याची आपली तयारी आहे असे त्यांनी आव्हान दिले.