'सॅफ' चित्रोत्सव आजपासून गाजलेल्या चित्रपटांचा समावेश

पणजी, दि. २६ (प्रतिनिधी): दक्षिण आशियाई देशांतर्गत असलेले सर्व मतभेद दूर सारून बंधुत्वाचे अतूट नाते निर्माण व्हावे व मानवता हाच सर्वश्रेष्ठ धर्म असल्याचा संदेश सर्वांपर्यंत पोहचवावा या उद्देशाने "विसर्जन सीमांचे' या बोधवाक्याने उद्या २७ रोजी गोव्यात प्रथमच दक्षिण आशियाई चित्रपट महोत्सवाचे ("सॅफ'चे) थाटात उद्घाटन होणार आहे. ३० रोजी महोत्सवाचा समारोप होईल.
मुख्यमंत्री दिगंबर कामत यांनी घेतलेल्या पत्रकार परिषदेत ही घोषणा केली. यावेळी महोत्सव आयोजन समितीचे अध्यक्ष तथा कला अकादमीचे उपाध्यक्ष जितेंद्र देशप्रभू, सभापती प्रतापसिंग राणे, ज्येष्ठ चित्रपट दिग्दर्शक महेश भट, अभिनेत्री झेबा बख्तियार, अफगाणी अभिनेत्री खादेरा युसुफी, "सॅफ'चे महासचिव राहुल बारूआ, गोवा मनोरंजन संस्थेचे नवनियुक्त मुख्य कार्यकारी अधिकारी मनोज श्रीवास्तव उपस्थित होते.
दक्षिण आशियाई फाउंडेशन, गोवा कला अकादमी व मनोरंजन संस्था यांच्या संयुक्त विद्यमाने कला अकादमीच्या मास्टर दीनानाथ मंगेशकर सभागृहात उद्या संध्याकाळी ५ वाजता या महोत्सवाचे उद्घाटन मुख्यमंत्री दिगंबर कामत यांच्या हस्ते होणार आहे. यावेळी सांस्कृतिक कार्यक्रम होणार असून त्यानंतर अफगाणी चित्रपट "ओसामा' प्रदर्शित केला जाईल. याप्रसंगी चित्रपट उद्योगातील अनेक महनीय व्यक्ती उपस्थित राहणार असून त्यात महेश भट, पूजा भट, मधुर भांडारकर,सुधीर मिश्रा, रणधीर कपूर, "हिना'या गाजलेल्या चित्रपटाची नायिका व प्रसिद्ध पाकिस्तानी अभिनेत्री झेबा बख्तियार तसेच दक्षिण आशियाई चित्रपट उद्योगातील चित्रपट निर्माते व कलाकार हजर राहणार आहेत.
२७ ते ३० जूनपर्यंत चालणाऱ्या या महोत्सवात दक्षिण आशियाई देशातील एकूण ४५ चित्रपट प्रदर्शित केले जातील. या महोत्सवात अफगाणिस्तान, बंगलादेश, भूतान, भारत, मालदीव, नेपाल, पाकिस्तान व श्रीलंका या देशातील चित्रपटांचा समावेश आहे.
गोव्यात चित्रपट संस्कृती रुजविण्यासाठी या महोत्सवाचा उपयोग नक्कीच होणार आहे. या महोत्सवानिमित्ताने विविध चित्रपट दिग्दर्शक तथा कलाकार यांच्याबरोबर संवाद व चर्चासत्राचा कार्यक्रम २८ रोजी होणार आहे. चित्रपट उद्योगाशी संबंधित तंत्रज्ञान,सर्जनशीलता,तसेच इतर गोष्टींबाबत आदानप्रदान व देवाणघेवाणही यानिमित्ताने केली जाणार आहे. मॅकनिझ पॅलेस व कला अकादमीच्या सिनेमागृहात हे चित्रपट प्रदर्शित केले जातील असेही मुख्यमंत्र्यांनी सांगितले. यावेळी "उनादीत्य' या बांगलादेशी चित्रपटाचा प्रीमियर होणार आहे. "साक्षी' व 'मरेपर्यंत फाशी' या चित्रपटाचे खास प्रदर्शन या महोत्सवानिमित्ताने होईल. महोत्सवात भाग घेण्यासाठी "प्रथम येणाऱ्यास प्रथम संधी' या तत्त्वावर प्रवेश दिला जाईल. काही जागा आरक्षित असतील.