भाजप होणार "हायटेक' : प्रद्युत बोरा

पणजी,दि.२८(प्रतिनिधी) : सध्याचे युग हे माहिती तंत्रज्ञानाचे असून राजकीय पक्ष या नात्याने बदलत्या काळानुरूप सज्ज राहणे आपले कर्तव्य आहे. माहिती तंत्रज्ञानाचा वापर पक्ष संघटनेत करून घेण्याचा पहिला मान मिळवलेला भारतीय जनता पक्ष आता लवकरच "हायटेक' होणार असल्याची घोषणा भारतीय जनता पक्ष माहिती तंत्रज्ञान विभागाचे राष्ट्रीय निमंत्रक प्रद्युत बोरा यांनी केली.
राष्ट्रीय भाजप माहिती तंत्रज्ञान विभागाच्या अखिल भारतीय पातळीवरील दुसऱ्या मेळाव्याचे आज प्रदेशाध्यक्ष श्रीपाद नाईक यांच्या हस्ते उद्घाटन करण्यात आले. यावेळी या विभागाचे राष्ट्रीय निमंत्रक प्रद्युत बोरा, विभागाचे राष्ट्रीय सदस्य सुनील पाल, राज्य विभाग प्रमुख राजू नाईक, भाजप सरचिटणीस गोविंद पर्वतकर आदी उपस्थित होते. दोन दिवस चालणाऱ्या या मेळाव्यात माहिती तंत्रज्ञान विषयावर सखोल माहिती देण्यात येणार असून या निमित्ताने विविध जगविख्यात कंपनीच्या वरिष्ठ अधिकाऱ्यांना खास आमंत्रित करून माहिती तंत्रज्ञानाबाबत देशाची कोणत्या दिशेने वाटचाल सुरू आहे व त्यात काय बदल अपेक्षित आहेत, यावर मार्गदर्शन करण्यात येणार आहे. माहिती तंत्रज्ञानाबाबत भाजपचे धोरण काय असेल व केंद्रात भाजपचे सरकार सत्तेवर आल्यानंतर या विभागात नेमकी काय भूमिका घ्यायची याबाबतचा मसुदा या निमित्ताने तयार केला जाणार असल्याचे श्री. बोरा म्हणाले.
भाजपच्या या अनोख्या योजनेची माहिती देण्यासाठी पणजी येथील मुख्यालयात आयोजित केलेल्या पत्रकार परिषदेत श्री.बोरा यांनी हा तपशील दिला. देशात सर्वांत प्रथम १९९६ साली भाजपने आपले संकेतस्थळ खुले केले. त्यानंतर गेल्या जुलै २००७ महिन्यात पक्षाचा खास माहिती तंत्रज्ञान विभाग स्थापन करण्यात आला. देशात मोबाईल-टेलिफोनिक क्रांती घडवल्यानंतर आता यापुढे संगणक क्रांती घडवण्याचे लक्ष्य भाजपने आपल्या डोळ्यांसमोर ठेवले आहे. माहिती तंत्रज्ञानाशी संबंधित दर्जेदार वस्तू कमी किमतीत देशातील सामान्य जनतेला मिळवून देऊन त्यांना या बदलत्या ओघात सामील करून घेण्याचे उद्दिष्टही ठेवण्यात आल्याचे बोरा यांनी सांगितले.
सध्या भाजपचे दिल्ली येथील मुख्यालय पूर्णपणे हायटेक बनवण्यात आले आहे. येत्या ६० दिवसांत गोव्यातील मुख्यालयही पूर्णपणे माहिती तंत्रज्ञानयुक्त बनवण्यात येणार असल्याने येथून थेट दिल्ली येथे संपर्क व इतर माध्यमांव्दारे जोडले जाणार आहे. दिल्ली येथील मुख्यालय देशातील सर्व प्रदेशांना जोडून भाजपची समांतर संपर्क नेटवर्किंग बनवण्याचे काम सध्या युद्धपातळीवर सुरू असल्याची माहिती देत हे काम येत्या लोकसभा निवडणुकीपूर्वी पूर्ण करण्यात येणार असल्याचेही त्यांनी यावेळी सांगितले. भाजपच्या प्रत्येक सक्रिय कार्यकर्त्यांसाठी स्वतंत्र संगणक तथा आयफोनची व्यवस्था केली जाणार असून सर्व संघटनात्मक व्यवहार हे माध्यमाने हाताळले जाणार असल्याची माहिती यावेळी त्यांनी दिली. देशपातळीवर अशी यंत्रणा उभारण्यासाठी पायाभूत साधनसुविधा उभारण्यात येणार असून भाजप हा देशातील पहिला "हायटेक' राजकीय पक्ष बनणार आहे असे ते म्हणाले.