जमावबंदीला आणखी २४ तासांची मुदतवाढ

हॉस्पिसियूत २ पेट्रोलबॉंबचा स्फोट; १ निकामी
मडगाव, दि. २८ (प्रतिनिधी) : कालच्या हिंसक घटनानंतर आज मडगाव व परिसरातील स्थिती संपूर्णतः नियंत्रणाखाली असली तरी खबरदारीचा उपाय म्हणून येथील जमावबंदीच्या आदेशाची मुदत उद्या रात्रीपर्यंत वाढवण्यात आली आहे. तसेच कालच्या घटनांसंदर्भात आज आणखी दोघांना अटक करण्यात आली. त्यामुळे याबाबत अटक केलेल्यांची एकूण संख्या १७ झाली आहे. दुसरीकडे बजरंग दलाचे कार्यकर्ते जयेश नाईक व इतरांना हॉस्पिसियूतील ज्या वार्डमध्ये पोलिस पहाऱ्यात ठेवले गेले होते तेथे अज्ञातांनी तीन पेट्रोलबॉंब फेकल्याने आज शहरात तो चर्चेचा विषय ठरला.
जमावबंदी आदेशाच्या विस्ताराची घोषणा मुख्य सचिव जे. पी. सिंग यांनी आज पत्ररिषदेत केली. सायंकाळी त्यांनी समाजात शांतता घडवून आणण्याच्या दृष्टीने विविध समाजातील नेत्यांची व प्रतिनिधींची एक बैठक घेऊन चर्चा केली पुन्हा अशी बैठक ९ जुलै रोजी होणार आहे. ही समिती विविध भागात जाऊन लोकांशी संपर्क साधणार आहे.
हॉस्पिटलमधील घटना
हॉस्पिसियूत बजरंग दलाचे जयेश नाईक व इतर ज्या वॉर्डात उपचारासाठी होते तेथे मध्यरात्री तीनच्या सुमारास ३ पेट्रोलबॉंब फेकण्यात आले. त्यातील दोन फुटले. तिसरा निकामी झाला. मात्र, याचा दुपारपर्यंत पंचनामा झाला नाही, अशी तक्रार संबंधितांनी केली. या लोकांना रात्री उशिरा अटक होऊन तेथे पोलिस बंदोबस्त असताना हे स्फोट कसे झाले याबद्दल आश्र्चर्यच व्यक्त होत आहे. भाजप नेते शर्मद रायतूरकर व त्यांचे सहकारी रात्री २ वाजेपर्यंत तेथे होते. त्यंाना पोलिसांनी तेथून घालवले व नंतर हा प्रकार घडला.
हॉस्पिटलांत दाखल केलेल्या ५ जणांची प्रकृती गंभीर आहे. तथापि, चिंतेचे कारण नसल्याचे सूत्रांनी सांगितले. या जखमीची काळजी घेण्यासाठी मडगाव भाजप मंडळाचे पदाधिकारी जातीने वावरत होते. आमदार विजय पै खोत , सौ. छाया पै खोत, सौ. सुचेता मळकर्णेकर व इतर नेते आज दिवसभर हॉस्पिटलमध्येच होते.
पोलिसांचे अटकसत्र
पोलिसांनी काल सुरू केलेले अटकसत्र आजही सुरूच होते. काल रात्री उशिरा त्यांनी नगरसेवक राजू शिरोडकर यांना काही कामासाठी म्हणून बोलावून आणले व नंतर अटक केली. आज सकाळी मडगाव भाजप मंडळाचे पदाधिकारी देविदास बोरकर हे स्वतःच्या दुकानासमोर उभे असताना त्यांना पकडून आणले व कोठडीत टाकण्यात आले. नंतर उभयतांच्या अटकेविरुद्ध खासदार श्रीपाद नाईक यांनी प्रशासनाला खणखणीत इशारा दिला .
पोलिसांनी आज कालच्या घटनेसंदर्भात नन्ही शेख व महमद रफीक या आणखी दोघांना अटक केल्यामुळे अटक केलेल्यांची एकूण संख्या १७ झाली आहे. त्यातही मंतेश रागी याचे घर व दुकान फोडल्याच्या घटनेसंदर्भात ५ जणांना, तर बाकीच्या घटनांसंदर्भात १२ जणांना अटक करण्यात आली.
दरम्यान आके येथे मुकद्दर नामक एका परप्रांतीय व्यापाऱ्याचे लाकडी फर्निचरचे दुकान काल उत्तररात्री आगीत खाक झाले. आगीचे कारण कळू शकले नाही.
दरम्यान काल अटक केलेल्या १५ जणांची एका दिवसाच्या पोलिस कोठडीत रवानगी करण्यात आली आहे.