भाजपचा दे धक्का! लोकसभा निवडणूक : उमेदवारांची पहिली यादी जाहीर

नवी दिल्ली, दि. २६ : भारतीय जनता पक्षाने बेसावध कॉंग्रेसला जोरदार धक्का देताना आज आगामी लोकसभा निवडणुकीसाठी आपल्या उमेदवारांची पहिली यादी जाहीर केली. त्यामध्ये पक्षाचे ज्येष्ठ नेते व राष्ट्रीय लोकशाही आघाडीचे पंतप्रधानपदाचे उमेदवार लालकृष्ण अडवाणी, उत्तर गोव्याचे खासदार श्रीपाद नाईक, नवज्योतसिंग सिद्धू, विनोद खन्ना, अनुराग ठाकूर व टी. पी. एस. रावत यांचा समावेश आहे.
श्री. अडवाणी गुजरातमधील गांधीनगरमधून, श्रीपाद नाईक उत्तर गोव्यातून, सिद्धू अमृतसरहून, विनोद खन्ना पंजाबमधील गुरुदासपूरहून, हिमाचल प्रदेशचे मुख्यमंत्री प्रेमकुमार धुमल यांचे पुत्र ठाकूर हमीरपूरहून तर निवृत्त लेफ्टनंट जनरल रावत हे उत्तराखंडमधील पौरी गढवाल मतदारसंघातून निवडणूक लढवणार आहेत. ही माहिती आज येथे भाजपचे माजी अध्यक्ष तथा ज्येष्ठ नेते व्यंकय्या नायडू यांनी पत्रकारांना दिली तेव्हा माध्यमांच्या प्रतिनिधींवरही चकित होण्याची पाळी आली. ते म्हणाले, लोकसभेच्या निवडणुका अजून काही महिने लांबणीवर आहेत हे आम्ही जाणून आहोत. तथापि, आम्ही त्याची तयारी आतापासूनच सुरू केली आहे. पक्षाध्यक्ष राजनाथसिंग यांच्या अध्यक्षतेखाली येथे आज झालेल्या खास बैठकीत या मुद्यावर गंभीरपणे चर्चा झाली. त्यानंतरच उमेदवारांची पहिली यादी जाहीर करण्याचा निर्णय घेण्यात आला. येत्या ऑगस्टपर्यंत उमेदवारी निवडीची प्रक्रिया पूर्ण केली जाणार आहे.
आजच्या बैठकीला श्री. अडवाणी यांच्यासह व्यंकय्या नायडू, डॉ. मुरलीमनोहर जोशी, विनय कटियार, अनंतकुमार, सुषमा स्वराज तसेच भाजपचे पंजाब, गुजरात, हिमाचल प्रदेश व गोवा या राज्यांतील प्रतिनिधी उपस्थित होते. यदाकदाचित केंद्रातील संयुक्त पुरोगामी आघाडीचे सरकार गडगडलेच तर प्राप्त परिस्थितीत कोणती भूमिका घ्यायची यावरही आजच्या बैठकीत चर्चा करण्यात आली.
दरम्यान, पक्षाने आदेश दिला तर आपणही निवडणूक रिंगणात उतरण्यास उत्सुक आहोत, असे पक्षाध्यक्ष राजनाथसिंग यांनी स्पष्ट केले. भाजपच्या या अफलातून कृतीमुळे खिंडीत सापडलेल्या कॉंग्रेसला जोरदार दणका बसला आहे. आता डाव्यांशी बैठका करायच्या की, निवडणुकांवर विचार करायचा की भाजपला रोखण्यासाठी व्यूहरचना आखायची, असा तिहेरी पेच कॉंग्रेससमोर निर्माण झाला आहे.