विविध रस्ता अपघातांत उत्तर गोव्यात दोघे ठार

म्हापसा, पेडणे दि. १ (प्रतिनिधी) - आज उत्तर गोव्यात दोन वेगवेगळ्या ठिकाणी झालेल्या रस्ता अपघातांत दोघांना आपले प्राण गमवावे लागले. पर्वरी येथे आज सकाळी झालेल्या एका अपघातात जखमी झालेल्या पर्वरी येथील दुचाकीस्वाराचे गोमेकॉत उपचार घेत असता निधन झाले तर आज संध्याकाळी ५.३० वा. धारगळ - दोनखांब येथे एका टॅंकरने जबर धडक देऊन एका शिक्षकाचा जीव घेतला.
आज सकाळी ९.४० वा. पर्वरी बाजार येथील किशोर वसंत गाड केरकर हा फोंडा येथे आपल्या जीए-०३-एम ६५६८ या दुचाकीवरून कामानिमित्त जात असता पर्वरी वडाजवळ येथील चढावावर एका बसने त्याला जबर धडक दिली. त्यात त्याच्या डोक्याला गंभीर दुखापत झाली. जमलेल्या लोकांनी पर्वरी पोलिसांना माहिती दिल्यानंतर सुमारे २५ मिनिटांनी ते घटनास्थळी पोहोचले व सदर इसमाला एका खाजगी गाडीतून गोमेकॉत उपचारांसाठी दाखल करण्यात आले. आज संध्याकाळी उपचार घेत असतानाच सदर इसमाचे निधन झाले असल्याची माहिती त्याच्या नातेवाइकांनी दिली.
दरम्यान, पोलिसांनी हा "सेल्फ' अपघात असल्याचे सांगून याप्रकरणी कुठलीही तक्रार नोंद झाली नसल्याचे सांगितले.

धारगळ अपघातात
शिक्षकाचे निधन

दरम्यान, आज संध्याकाळी ५.३० वा. धारगळ - दोन खांब येथे प्रवासी बसच्या प्रतीक्षेत असलेले खरी - शिरगाळ येथील शिक्षक वासुदेव वि. आरोलकर (४५) यांना कॅंटरने ठोकरल्याने त्यात त्यांचे निधन झाले.
सविस्तर माहितीनुसार, आज संध्याकाळी धारगळ - दोनखांब येथे प्रवासी बसची प्रतीक्षा करत थांबलेल्या वासुदेव आरोलकर यांना जीए ०३ के १७५६ या धारगळहून कोलवाळमार्गे जात असलेल्या कॅंटरने ठोकरले. यात आरोलकर यांच्या डोक्याला जबर मार लागला. त्यांना जखमी अवस्थेत म्हापसा येथील आझिलो इस्पितळात उपचारासाठी नेण्यात आले. परंतु, उपचार सुरू करण्यापूर्वीच त्यांचे निधन झाले.
दरम्यान, अपघात घडताच वाहनचालक वाहन सोडून पळून गेला. अपघाताची माहिती मिळताच पोलिस निरीक्षक उत्तम राऊत देसाई यांच्या मार्गदर्शनाखाली हवालदार श्री. परब यांनी पंचनामा केला व वाहनचालकाविरुद्ध मनुष्यवधाचा गुन्हा नोंदवण्यात आला.
खरी - शिरगाळ येथील रहिवासी असलेले मयत वासुदेव आरोलकर हे पेशाने शिक्षक असून ते अविवाहित होते. साखळी येथील शांतादुर्गा हायस्कूलमध्ये ते विद्यादानाचे काम करत होते. त्यांच्या पश्चात आई व तीन बहिणी असा परिवार आहे.
दरम्यान, मुशीर कोलवाळ येथे ३ जानेवारी रोजी झालेल्या अपघातात जखमी झालेल्या रवींद्रनाथ विश्वास (५२) या मूळ पश्चिम बंगाल येथील इसमाचे आज उपचार घेत असताना निधन झाले.