जेम्सच्या गूढ मृत्यू प्रकरणी प्रसंगी न्यायालयातही जाणार

कुळे नागरिक समितीचा निर्धार

कुळे, दि. ४ (प्रतिनिधी) - कुळे येथे एका बार आणि रेस्टॉरंटमध्ये काम करणाऱ्या जेम्स आल्मेदा यांच्या संशयास्पद मृत्युप्रकरणी कुळे पोलिसांनी चौकशीला आरंभ केला असला तरी हे प्रकरण गंभीर स्वरूपाचे असल्याने पोलिसांनी अधिक तातडी दाखवण्याची गरज असल्याचे कुळे नागरिक समितीचे अध्यक्ष संतोष मसुरकर यांनी आज "गोवादूत'शी बोलताना सांगितले.
जेम्स हा मूळ मंगलोरचा असला तरी गेली अनेक वर्षे तो गावात होता. त्याच्या अचानक मृत्युमुळे सध्या अनेक तर्कवितर्क केले जात असून त्याच्या मृत्युची वस्तुस्थिती लोकांना कळलीच पाहिजे, असे ते म्हणाले. ज्या पंचायत सचिवाने डॉक्टर म्हणवणाऱ्या एका इसमाच्या दाखल्यावरून जेम्सच्या मृत्युचा दाखला दिला त्याच्याविरुद्धही पंचायत संचालनालय तसेच कुळे पोलिसांत तक्रार दाखल केली जाणार असल्याचे मसुरकर यांनी सांगितले.
दरम्यान, पंचायतीने दिलेल्या दाखल्याच्या आधारे ज्या दफनभूमीत जेम्सचा दफनविधी पार पाडण्यात आले, त्या चर्चच्या फादरची भेट घेऊन कुळ्याचे पोलिस निरीक्षक मनोज म्हार्दोळकर यांनी आज चर्चा केली. मिळालेल्या माहितीनुसार संबंधित बार मालकाने जेम्स हा गेली चार - पाच वर्षे आपल्याकडे कामाला होता व आता त्याच्या मृत्युनंतर त्याला कोणीच नसल्याने आपण त्याचे अंत्यसंस्कार करत असल्याचे लेखी स्वरूपात सांगितल्याचे समजते.
महत्त्वाचे म्हणजे जेम्स याचा मृत्यू नैसर्गिकरीत्या झाला हे स्पष्ट करणारा कोणताही पुरावा सदर बारच्या मालकाकडे उपलब्ध नसून त्याचे शवविच्छेदनही करण्यात आलेले नाही. नागरिक समितीने हाच मुद्दा उचलून धरताना या संशयास्पद प्रकरणाच्या कसून चौकशीची मागणी केली होती. मिळालेल्या माहितीनुसार जेम्सचे कुटुंबीय त्याच्या कोडी मंगलोर या गावी आहेत. त्यांचाही शोध घेण्याची आवश्यकता असल्याचे नागरिक समितीचे म्हणणे आहे.
केप्याचे विभागीय दंडाधिकारी उद्या (शुक्रवारी) सकाळी कुळ्यात दाखल होण्याची शक्यता असल्याचे नागरिक समितीच्या पदाधिकायांनी सांगितले. दरम्यान, आपण डॉक्टर असल्याच्या थाटात जेम्सच्या नैसर्गिक मृत्युचा दाखला दिलेल्या इसमाला त्या दाखल्यानुसार त्याच्या मृत्युचा रीतसर दाखला देणाऱ्या कुळे पंचायतीच्या सचिवाला उद्यापर्यंत चौकशीसाठी पोलिसात पाचारण केले जाण्याची शक्यता आहे. मात्र हे प्रकरण इतके गंभीर असूनही पोलिसांनी त्यासंदर्भात अद्याप गुन्हा नोंदवला नसल्याने कुळे मागरिक समितीने नाराजी व्यक्त केली आहे. प्रसंगी कोणत्याही क्षणी न्यायालयात धाव घेण्याची आमची तयारी असल्याचेही श्री. मसुरकर यांनी सांगितले. खरेतर पोलिसांनी एव्हाना पंचायतीकडून मृत्यूच्या दाखल्याची पुस्तिका तसेच संबंधित दस्तऐवज ताब्यात घेण्याची गरज होती, परंतु पोलिसांना या घटनेचे अद्याप गांभीर्य कळले की नाही हे कळण्यास मार्ग नाही, असेही मसूरकर म्हणाले.
एका रेस्टॉरंटमध्ये काम करणाऱ्या व्यक्तीचा अचानक मृत्यू होतो, तो नेमका कोणत्या कारणावरून मृत पावला हे जाहीर केले जात नाही, डॉक्टर म्हणवणाऱ्या एका इसमाकडून तो नैसर्गिकरीत्या मृत्यू पावल्याचा दाखला घेतला जातो, नंतर तो दाखला पंचायतीला सादर केला जातो, आधी किमान दोन प्रसंगी पंचायतीने त्या कथित डॉक्टराचा दाखला अधिकृत ठरत नसल्याचे स्पष्ट केलेले असते; परंतु यावेळी तो स्वीकारून जेम्सच्या मृत्यूचा दाखला दिला जातो आणि त्या आधारे जेम्सच्या मृतदेहाची विल्हेवाट लावली जाते, हा सगळा प्रकारच गंभीर आहे. पोलिसांना त्याचे गांभीर्य कितपत समजले, हेच कळण्यास मार्ग नसल्याचे श्री. मसुरकर म्हणाले.