पालिकेने 'आराखड्या'कडे कानाडोळा केल्याचे सिद्ध

दुकाने कायदेशीर असल्याचा म्हापसा नगराध्यक्षांचा दावा
म्हापसा, दि. ३१ (प्रतिनिधी): म्हापसा बाजारातील वीस मीटरची जागा ही "कॉस्मॉस सेंटर' च्या नियोजित रस्त्यासाठी बाह्य विकास आराखड्यात निश्चित करण्यात आलेली आहे हे सिद्ध होते, पण या जागेत उभारण्यात आलेली दुकानेही कायदेशीरच आहेत, अशी नोंद पालिकेतील कागदपत्रांत सापडते. ही कामे आपल्या कारकिर्दीत झालेली नाहीत त्यामुळे याप्रकरणी सखोल अभ्यास केल्याविना वक्तव्य करणे उचित ठरणार नाही, अशी प्रतिक्रिया म्हापशाच्या नगराध्यक्ष रूपा भक्ता यांनी "गोवादूत' शी बोलताना व्यक्त केली.
"कॉस्मॉस सेंटर' च्या रस्त्याचा वाद आता दिवसेंदिवस चिघळत चालला आहे. एकीकडे बाह्य विकास आराखडा व तत्कालीन पालिकेने दिलेले परवाने व दुसरीकडे नियोजित आराखड्यात उभी राहिलेली दुकाने व पालिकेची त्यांना मिळालेली मान्यता आदी प्रकार कायदेशीर कचाट्यात सापडण्याचीच दाट शक्यता निर्माण झाली आहे. या एकूण प्रकरणांत पालिकेसह उत्तर गोवा नियोजन विकास प्राधिकरणावरील तत्कालीन मंडळही कात्रीत सापडण्याचा धोका निर्माण झाला आहे.
" कॉस्मॉस सेंटर' च्या या संकुलात मोठ्या प्रमाणात दुकाने, कार्यालये व इतर आस्थापने आहेत व या संकुलाचा रस्ता बंद झाल्याने या लोकांची गैरसोय होत आहे याचा आपल्याला खेद वाटतो,असेही त्या म्हणाल्या. बाह्य विकास आराखड्यात बाजारातून थेट सुमारे वीस मिटरचा रस्ता कॉस्मॉस सेंटरच्या दिशेने निश्चित केल्याचे स्पष्ट आहे पण त्यानंतर नेमकी ही दुकाने या नियोजित जागेवर उभी राहिली व पालिकेतील नोंदी प्रमाणे ती कायदेशीर असल्याचेच स्पष्ट आहे,असेही त्या म्हणाल्या. १९७० साली म्हापसा नगरपालिकेत दोन दुकानांचे बांधकाम करून म्हापसा बझार ग्राहक सोसायटीला भाडेपट्टीवर दिले त्यावेळी जयराम सिरसाट हे प्रशासक होते. त्यानंतर १९८४ साली ५० दुकाने पुढील रांगेत जुजे फिलीप हे प्रशासक असताना बांधण्यात आल्याची नोंद नगरपालिकेकडे आहे,असेही त्या म्हणाल्या. नगरपालिकेने त्यावेळी निर्णय घेऊन दुकाने बांधण्याचे काम केल्यामुळे ती बांधकामे बेकायदेशीरच असणे क्रमप्राप्त ठरते,असेही त्यांनी यावेळी सांगितले.
"कॉस्मोस सेंटर' संकुलातील इमारतींनी पार्किंग व्यवस्था केली आहे का असा प्रश्न विचारला असता, म्हापसा नगरपालिकेने सर्व ठिकाणी पार्किंग आखणीची व्यवस्था करूनच काम केले जाते. पण म्हापसा शहरात वाढणाऱ्या लोक संख्येमुळे आणि वाढत्या वाहनांच्या रहदारीमुळे पार्किंग व्यवस्थेचा खोळ खंडोबा होतो व त्यामुळेच समस्या निर्माण झाल्याचे त्या म्हणाल्या. पार्किंग विषयी लवकरच तोडगा काढण्यात येईल अशी माहिती त्यांनी दिली. काही बिल्डरांकडून नगरपालिकेला बराच त्रास होतो आहे व त्यांच्याकडून आराखड्यांचे उल्लंघनही होते. या विषयावरही तोडगा काढण्याचा प्रयत्न होईल,असेही श्रीमती भक्ता यांनी सांगितले.
म्हापसा बझारचे दुकान पूर्ण कायदेशीरः गुरूदास धुळापकर
म्हापसा बझार ग्राहक संस्थेचे दुकान पूर्णपणे कायदेशीर आहे व त्याबाबतची कागदपत्रे संस्थेकडे उपलब्ध आहेत, असा दावा संस्थेचे अध्यक्ष गुरूदास धुळापकर यांनी केला. हे दुकान खुद्द नगरपालिकेनेच बांधून दिले आहे त्यामुळे ते बेकायदा असण्याची शक्यताच नाही, असेही त्यांनी स्पष्ट केले.