खासदार लाच प्रकरण: एक कोटी घेऊन आलेला संजीव सक्सेना कोण?

नवी दिल्ली, दि. ११ : आयबीएन-सीएनएन दूरचित्रवाणी वाहिनीने आज भाजप खासदारांना लाच देण्याचा प्रयत्न झाल्याप्रकरणी सीडी लोकसभेच्या चौकशी समितीसमोर सादर केल्यानंतर ती सीडी प्रेक्षकांसाठी प्रदर्शित केली. तीन भाजप खासदारांना लाच देण्यासंबंधी चर्चेसाठी सपचे एक ज्येष्ठ नेते भाजप खासदाराच्या निवासस्थानी आल्याचे दाखविण्यात आले आहे, त्यानंतर प्रत्यक्ष एक कोटी रुपये घेऊन संजीव सक्सेना हा त्यांच्या घरी आला व त्याने सपचे सरचिटणीस अमरसिंग यांच्याशी मोबाईलवरून संभाषण केल्यावर व उपस्थित तीन भाजप खासदारांनी फोनवर बोलल्यावर हा व्यवहार पूर्ण करण्यात आला असे या सीडीवरून दिसून येते." या प्रकरणात कॉंग्रेस नेत्याचा हात असल्याचे उघड होत नाही,' असे या वाहिनीचे संचालक राजदीप सरदेसाई यांनी आपल्या निवेदनात स्पष्ट केले. दरम्यान, प्रत्यक्ष रोख देणारे संजीव सक्सेना हे अमरसिंग यांच्यावतीने आले होते, हे सिद्ध करण्याएवढा पुरावा आपल्याशी असल्याचा दावा भाजपने केला आहे.