'भज्जी' अडचणीत, श्रीशांतला थोबाडीत लगावली

मोहाली, दि. २६ : इंडियन प्रीमियर लीग स्पर्धेत मुंबई इंडियन्स संघाला काल लागोपाठ तिसऱ्यांदा पराभव पत्करावा लागल्याचा संताप अनावर होऊन त्या संघाचा हंगामी कर्णधार हरभजन सिंगने याने किंग्ज एकादश पंजाबचा खेळाडू श्रीकुमार श्रीशांत याला भर मैदानात थोबाडीत लगावली. त्यामुळे सातत्याने वादाच्या भोवऱ्यात अडकणाऱ्या "भज्जी'वर कारवाई होण्याची शक्यता असून तो कमालीचा अडचणीत आला आहे.
काल शुक्रवारी किंग्ज एकादश पंजाब व मुंबई इंडियन्स या दरम्यान इंडियन क्रिकेट लीग स्पर्धेतील १० वा सामना मोहाली येथे पार पडला. या सामन्यात मुंबई इंडियन्स संघाला किग्ज एकादशकडून पराभव पत्करावा लागला. खेळ संपल्यानंतर किंग्ज एकादशचे खेळाडू मुंबई इंडियन्स संघातील खेळाडूंशी हस्तांदोलन करीत होते. त्याचवेळी हरभजनने श्रीशांतला थप्पड लगावली. त्यामुळे क्षणभर श्रीशांतदेखील अवाक झाला. त्यानंतर दोन्ही संघातील खेळाडूंनी परस्परांना दूर केले.
हरभजनकडून थप्पड खावी लागल्यामुळे अपमानित झालेल्या श्रीशांतला मैदानावरच अश्रू अनावर झाले. तो ढसाढसा रडला. त्यावेळी कुमार संगकारासह काही खेळाडूंनी त्याला धीर दिला.
किंग्ज एकादशचे प्रशिक्षक टॉम मुडी व कर्णधार युवराज सिंगने या घटनेबद्दल तीव्र नाराजी व्यक्त केली. शुक्रवारी रात्री सामन्यानंतरच्या पत्रकार परिषदेत बोलताना युवराज सांगितले की, हरभजन सिंगने श्रीशांतला थोबाडीत मारली असून ही गोष्ट सहन करण्यापलीकडची आहे.
या घटनेनंतर हरभजनने तातडीने ड्रेसिंग रुममध्ये जाऊन आपण केलेल्या कृत्याबद्दल श्रीशांत याची माफी मागितली. हरभजन व श्रीशांत हे दोघेही भारतीय संघातील महत्त्वाचे खेळाडू आहेत. दोघेही स्वभावाने तापट आहेत. मात्र या प्रकरणानंतर किंग्ज एकादश पंजाब व मुंबई इंडियन्स या दोन्ही संघांत दुरावा निर्माण होण्याची शक्यता नाकारता येत नाही.
भारतीय क्रिकेट नियामक मंडळाचे सचिव निरंजन शाह यांनी सांगितले की, हरभजन सिंगने गैरवर्तन केल्याबद्दल स्पष्टीकरण देण्याची गरज आहे. भारतीय क्रिकेट नियामक मंडळाने या प्रकरणाची गंभीर दखल घेतली आहे. मंडळाने हरभजनवर टीका केली आहे. तुझ्याविरुद्ध शिस्तभंगाची कारवाई का केली जाऊ नये अशी विचारणा या नोटिशीत करण्यात आली आहे.
या संदर्भात इंडियन प्रीमियर लीगकडून मात्र हरभजन सिंगविरुद्ध कोणतीही तक्रार करण्यात आलेली नाही.
मोहालीतील लढतीचे सामनाधिकारी फारुक इंजिनीयर यांनी सांगितले की, या संदर्भात आपल्याकडे पंजाब संघाने तोंडी किंवा लेखी तक्रार केलेली नाही. आपण हा प्रसंग पाहिलेला नाही. काय घडले, का घडले, कसे घडले याबद्दल आपणाला काहीच माहिती नाही. या संदर्भांत कोणतीही कारवाई करण्यापूर्वी आपण व्हिडिओ क्लिपींग्ज पाहणार आहोत. जर ही गोष्ट खरी असेल, तर त्यासंदर्भात योग्य ती कारवाई केली जाईल.
दरम्यान हरभजन सिंगला मुंबई इंडियन्स संघाचे हंगामी कर्णधारपद सोडण्यास सांगितले जाण्याची शक्यता आहे.
----------------------------------------
हरभजनला "कारणे दाखवा' नोटिस
हरभजनसिंगकडून श्रीशांतला थोबाडीत मारण्यात आली या प्रकरणाची भारतीय क्रिकेट नियामक मंडळाने गंभीर दखल घेतली आहे. त्याला कारणे दाखवा नोटीस मंडळाने दिली असून मंडळाने हरभजनला या संदर्भात २८ एप्रिलपर्यंत स्पष्टीकरण सादर करण्यास सांगण्यात आले आहे. यंदाच्या ऑस्ट्रेलिया दौऱ्यातही तो विविध कारणांमुळे वादाच्या भोवऱ्यात सापडला होता.